Meclis azaları boyunca mahkemelerniñ neticeleri belli oldı

04.10.201617:30

Qırımtatar Milliy Meclisiniñ toplaşuvında iştirak etkenleri içün para cezasınen cezalanğan Şevket Kaybulla, Sadıh Tabah ve Ali Hamzinniñ mahkeme qararına şikâyet etmege niyetleri yoq.

Bu aqta Meclis reisiniñ muavini İlmi Umerov bildirdi.

Onıñ sözlerine binaen, bugün Bağçasaray rayon mahkemesinde Şevket Kaybulla ve Sadıh Tabah boyunca memuriy protokollar baqıldı. Mahkeme bu insanlar boyunca para cezası şeklinde memuriy ceza aqqında qarar çıqardı.

Meclisiniñ daa dört azası — Emine Avamileva, Bekir Mamutov, Dilâver Akiyev ve Mustafa Mauşev — mahkemede qırımtatar tilinde qonuşmağa istegenleri, protokollarnı tizgen ROVD taqiqatçısı mahkemede sorğuğa çekilmesi kerek olğanı, bunen beraber, Meclis reisiniñ muavini İlmi Umerovnı, qaysı biriniñ evinde protokollarda qayd etilgen merasim keçirildi, davet etilmesi kerek olğanı aqqında ilân etti.

İşbu talaplar munasebetinen mahkemeci toplaşuvlarnı başqa künlerge keçirmek mecbur oldı. Böyleliknen, Emine Avamilevanıñ işi oktâbr 14-te, Mustafa Mauşevnıñ işi — oktâbr 20-de, Dilâver Akiyevniñ işi — oktâbr 24-te baqılacaq. Bekir Mamutov boyunca da para cezası şeklinde memuriy ceza aqqında qarar alındı. O, bu qararğa qarşı apellâtsiya mahkemesine şikâyet arizasını bermege niyetlene.

İlmi Umerovnıñ bildirgen malümatına binaen, bugün Abduraman Egiz ve Enver Kurtiyev boyunca da memuriy protokollar tizildi. Olarnıñ işleri boyunca mahkeme toplaşuvları oktâbr 6-da keçirilecek.

«Meni ise, ta sentâbr 26-da RF KOAP 20.28 maddesiniñ 1-ci qısmı boyunca memuriy uquq bozuluvınen qabaatlı tanıdılar ve kiçik para cezasını belgilediler, bu qararğa qarşı şikâyet arizasını bermege niyetlenem. Neticeler müsbet olacağına pek işanmayım, amma bu, kelecekte İnsan aqları boyunca Avropa mahkemesine ariza bermek imkânı olması içün kereklidir», — dep ilân etti İlmi Umerov.

Hatırlatamız ki, bundan evel Qırımtatar Milliy Meclisiniñ toplaşuvında iştirak etkenleri içün Ali Hamzin 1000 ruble ve İlmi Umerov 750 ruble para cezasınen cezalandı. Meclis azalarına «Faaliyeti toqtatılğanı aqqında qarar alınğan cemaat ya da diniy birleşmesi faaliyetini teşkil etüv» RF KOAP 20.28 maddesiniñ 1-ci qısmı boyunca qabaatlav taqdim etildi.

2016 senesi aprel 26-da Qırım Yuqarı mahkemesi Qırımtatar Milliy Meclisini ekstremistik teşkilât olaraq tanıdı ve onıñ faaliyetini Rusiye territoriyasında yasaq etti. Sentâbr 29-da Rusiye Yuqarı mahkemesi Meclisiniñ yasaq etilmesi aqqında Qırım Yuqarı mahkemesiniñ qararını tasdıqladı.

Фото аватара

Автор: Редакция Avdet

Редакция AVDET