Mısır kilselerinde patlavlar yanğıradı: 40-tan ziyade adam elâk oldı

10.04.20178:40

Mısır şimalinde eki şeerde bir qaç saat farqınen bir sıra terroristik ücüm yapıldı. Tal bazar künü kopt (hristian) kilselerinde eki patlav yanğıradı. 40-tan ziyade adam elâk oldı.

Birinci patlav Garbiya vilâyetinde Tanta şeerindeki «Mar Girgis» kilsesinde yüz berdi. Kütleviy haber vastalarınıñ malümatına binaen, neticede 30 adam elâk oldı, 50-den 70-ke qadar kişi yaralandı.

Bu aqta Mısır devlet televizionı bildire.

Bir qaç saat keçken soñ, daa bir patlav aqqında haber keldi Aleksandriya şeerinde. Bu yerde özüni öldürgen terrorist kilse qapısı yanında özüni patlattı. Kütleviy haber vastalarınıñ malümatına binaen, bu yerde kopt kilsesi patriarhı Teodor Ekinciniñ bulunması mümkün edi bu yerde onıñ rezidentsiyası yerleşe.

Bu patlav neticesinde 17 adam, bu cümleden üç politsiya hadimi, elâk oldı, daa 47 kişi yaralandı. Eki patlav neticesinde elâk olğanlarnıñ episi Mısır vatandaşları ola, olarnıñ arasında ecnebiyler olmadı.

«İslâm Devleti» (Rusiyede yasaq etilgen) taqımı özüni öldürgen adamlarnıñ ücümi içün mesüliyetni boynuna aldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET