Mustafa Degermenci ve Ervin İbragimovnıñ babaları Avropa parlamentinde sözde bulundı

16.03.201714:20

Tünevin, mart 15-te Avropa parlamentiniñ matbuat merkezinde Bağçasarayda qaçırılğan Ervin İbragimovnıñ babası Umer İbragimov, «fevral 26» işi boyunca yaqalanğan Mustafa Degermenciniñ babası Bekir Degermenci, bunen beraber, Qırım adliyecisi Emil Kurbedinovnıñ iştiragi ile matbuat konferentsiyası keçirildi.

Umer İbragimov matbuat konferentsiyası çerçivesinde onıñ oğlu taqip etilgeni ve qaçırılğanı aqqında añlattı. O, oğlunıñ qaçırılğanını köstergen videonı taqdim etti.

Bunen beraber, Umer İbragimov ayttı ki, qaçırılğanından evel onıñ oğlunı qorquza ediler.

«Sizge muracaat etmege isteyim, bu vaziyette neler yardım ete bilgenini soramağa isteyim. Onıñ kibi insanlar Qırımda az degil. Olar pek çoqlar», — dep qayd etti İbragimov.

Bekir Degermenci oğlunıñ cinaiy taqip etilgenini añlattı. Adliyeci Emil Kurbedinov Qırımdaki vaziyetni añlattı. O, yarımadada qırımtatarlarnıñ siyasiy maqsatlarnen taqip etilgenini ve adliyecilerge basım yapılğanını hatırlattı.

Avdetniñ evel bildirgenine köre, 2016 senesi mayıs 24-te Bağçasarayda qırımtatar milliy areketi faali, Bağçasaray şeer şurasınıñ sabıq deputatı, regional meclis azası, Bütün dünya qırımtatar kongressiniñ İcra şurası azası Ervin İbragimov ğayıp oldı. Onıñ maşnası onıñ yaşağan evi yaqınlarında açıq turğan tapıldı. Ğayıp olğan, babasına aytqan edi ki, 36-cı region 350 sanlı Shkoda Octavia A 6 onı nezaret ete.

Ervin İbragimovnıñ tutulğanını onıñ evi yanındaki tükânda yerleştirilgen video nezaret kameraları qayd etti. Videoda körüne ki, Yol-patrul hızmeti hadimleri urbasındaki belli olmağan şahıslar gençni tutıp, onı beyaz renkli Ford Tranzit avtomobiline oturttı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

европарламент1

европарламент

Фото аватара

Автор: Редакция Avdet

Редакция AVDET