Nikolay Polozov FSB-de sorğuğa çekilgeniniñ qaçıruv olğanını ayttı

25.01.201722:30

Yanvar 25-te Rusiye Federal Havfsızlıq hızmeti (FSB) hadimleri qırımtatar faalleri Ahtem Çiygoz ve İlmi Umerovnıñ adliyecisi Nikolay Polozovnı Aqmescitte tuttı ve onı qanunsız sorğuğa alıp ketti. Adliyeci uquq qoruyıcılarnıñ böyle areketlerini qaçıruv dep adlandırdı.

Onıñ sözlerine köre, onı şaat olaraq sorğuğa celp etmege İlmi Umerovnıñ işi boyunca taqiqatçı İgor Skripka tırıştı. Sorğu başlamazdan evel uquqçı ayttı ki, taqiqatçı Skripkanıñ areketleri qanunsız sayıla.

«Meni mecburiy şekilde sorğuğa alıp ketirmek onıñ qararı qanuniy mahkeme qararına esaslanmağan. Başlanğıç mahkemesi, qaysı biri dekabr 12-de keçirildi, taqiqatçı Skripkağa meni sorğuğa çekmek razılığını bergen olsa da, qarar qanuniy işke daa tüşürilmedi. Men ve menim imayecilerim alâqalı şikâyet berildi, ve apellatsion mahkemesi toplaşuvı şimdiki vaqıtqa qadar daa keçirilmedi», – dep bildirdi o.

Adliyeci, böyleliknen, netice çıqardı ki, taqiqatçınıñ areketleri onıñ vazifesiniñ sıñırından tış ola.

Polozov añlattı ki, taqiqatçınıñ iç bir sualine cevap bermedi ve oña A+ formatındaki kâğıtnı kösterdi, o yerde «İNDEMEY» dep yazdı ve öz areketine qanuniy aqlarını qayd etti – Federal qanunnıñ 63 sanlı 2002 senesi mayıs 31-de qabul etilgen Federal qanunnıñ 8-ci maddesi (Rusiye Federatsiyasında adliyeci faaliyeti ve adliyecilik aqqında qanun), RF Cinaiy-uquq kodeksiniñ 56-ci maddesiniñ 3-ci qısmı 2 maddesi. İşbu qanunğa köre, adliyeci, uquqiy yardım köstergeni neticesinde ögrengen malümatlar boyunca sorğuğa çekilmez.

«Hususan bu malümatnı taqiqatçı menden ögrenmege tırıştı», – dep bildirdi adliyeci.

Bundan da ğayrı, taqiqatçı adliyeci Polozovğa haber etti ki, ifadeler bermekni red etüv Cinaiy kodeks (308 maddesi) tarafından taqip etile, bu ise, 3 ayğa qadar apiske qapatmasını közde tuta.

«Bu, kerçekten de, FSB organlarınıñ esassız areketleridir, bu, adliyecige açıq basımdır!» – dep ayta Polozov.

Bunen beraber o qayd etti ki, o, serbest areket etmek, cep telefonını qullanmaq, adliyeci hızmetine muracaat etmek aqqından marum etildi.

Polozov qayd haber etti ki, o, bu mesele boyunca Qırım mahkemelerine, Rusiye Federatsiyası Anayasa mahkemesine ve İnsan aqları boyunca Avropa mahkemesine muracaat etecek.

Avdetniñ bildirgenine köre, qırımtatar faalleri Ahtem Çiygoz ve İlmi Umerovnıñ adliyecisi Nikolay Polozov Avropa Şurası Parlament assambleyasınıñ (PACE) yanvar sessiyasında iştirak etti. Adliyeci, sözde bulunıp, Qırımda adliyeciler taqip etilgenini bildirdi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET