Omsk sakinleri, içinde sıçan olğan Qırım konservalarını aşadı

31.10.201612:30
консервы ооо фортуна крым

Omsk sakinleri «Tomat sousınen Qara deñiz kilkası» konservalarında sıçan ve cam parçalarını kördi. Konservalar Aqmescitte (Simferopolde) «Fortuna Krım» şirketinde yapıldı. Omsk sakinleri mahsulatnı aman-aman aşap bitirgen soñ, qutu tübünde balıqqa oşamağan bir şeyni kördi.

Regional mühbirlerge şikâyet etken qadınnıñ sözlerine binaen, sıçan qutu tübüne yapışıp qalğan. O yerde ayvannıñ quyruğı, içekleri, kemikleri ve terisini körmek mümkün.

«Bu kün eski daireden yañı dairege köçe edik, – dep añlattı Omsk sakini yerli televizionğa. – Bunıñ içün yahşı aşamaq içün vaqtımız yoq edi, aqayım ve dostumnen konservalarnı aqşam aşamağa qarar aldıq. Men bunıñ biraz tadına baqtım, amma bundan qolay olmaz, çünki şimdi balanı emizem ve bilmeyim ki, o qadar ekzotik aşnıñ neticesi ne olacaq. Yahşı ki, bunı soñuna qadar aşap bitirmedik. Dostum bizden endi çıqtı, bundan soñ sofranı cıyıştırmağa başladım. Qutuğa baqsam – anda ise mına bu», – dep bildire «Omsk» DTRK-sı.

Qadın konservalarnı alğan yerli «Sibiriada» tükânında ayttılar ki, böyle vaqia olarda ilk sefer yüz berdi ve alıcığa onıñ parasını qaytarmağa, bundan soñ temin eticige şikâyet etmege azır olğanlarını bildirdiler. Amma yaş ananıñ bunda toqtamağa niyeti yoq – o Rospotrebnadzorğa şikayet arizasını berdi.

консервы фортуна крым с мышами

Фото аватара

Автор: Редакция Avdet

Редакция AVDET