Qarasuvbazarnıñ (Belogorsk) Büyük camisi yanında yaşağan şeer sakinleri tarafından, yerli akimiyetke, «yüksek sesnen oqulğan ezan» aqqında şikayet yazdılar.
Bu haberni Avdetke Qırım müftiyatında bildirdiler.
Şeer akimiyeti muşavere topladı. Bu toplantıda Qırım müsülmanlar müftisiniñ muavini, milletlerara munasebetleri ve sürgün etilgen vatandaşlar meseleleri boyunca Devlet komitetiniñ temsilcisi, Qarasuvbazar rayonınıñ memuriyet muavini, Rusiye istimalcı nezaretiniñ temsilcisi bulundular. Avdetniñ haberi olğanına köre, şeer memuriyetiniñ temsilcileri ezan sesi azlaştırılmasına istep, israr ettiler. Lȃkin müftiy muavini Ayder İsmailov Rusiye istimalcı nezaretine muracaat etip, ezan sesiniñ yüksekligini teşkermelerini ayttı.
Cami imamı Server Acimirov bildirgenine köre, ezan sedası yüksek degil, belgilengen qararda tura, onıñ içün sesni azlaştırmamaq qararına kelindi, çünki soñ müsülmanlar qomşu soqaqta bile ezannı eşitmeycekler.
«Muşavere barışıq alda bitti, er şey olğanı kibi qalacaq. Cami imamı aytqanı kibi, yerli sakinlerniñ şikȃyetleri siyrek şey degildir», — dep qoştı imam.
Ondan evel «QırımAqıqat» saytında, bu mevzuğa bağışlanğan blog peyda oldı. Bu yerde, muşavere qararına köre gece ve saba maallerinde ezan sesi azlaştırılacaq, dep bildirile. « provoslav sakinlerni uyatmamaq içün, dep ende muedzinge gece ve saba maallerinde ezannı fisilti etip aytmaq kerek olacaq».
«Yerli müsülmanlarğa ise, namazğa uyanmaq içün, müedzinniñ sesini diñlep degil de, çalar saatnen turmaq kerek olacaq», dep aytıla malümatta.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
