Qarasuvbazar-Seyitler (Belogorsk-Nijnegorskiy) yolunda keçken afta yüz bergen qazada qırımtatar qadını Zeyneb Ablâmitova elâk oldı. Daa bir vatandaşımız ağır alda buluna.
Qaza noyabr 18-de saba yüz berdi. Ford Transit avtomobiliniñ aydavcısı maşnanı idare etip olamadı ve qarşı taraf yoluna çıqtı, o yerde VAZ-2106 maşnasınen çatıştı. Qaza neticesinde altı adam zararlandı. VAZ-da bulunğan qadın elâk oldı. «Jiguli» aydavcısı, elâk olğan qadınnıñ qızı Zarema Ablâmitova Qarasuvbazar hastahanesiniñ reanimatsiya bölügine ağır alda ketirildi.
Avdetniñ elde etken malümatına binaen, Zarema Ablâmitovanıñ alı eyileşe. Onı reanimatsiyadan odağa (palatağa) keçirdiler. Zarema, eki balasınen ana-babasınen beraber Qarasuvbazar rayonındaki Cavluş Qarabay (Mironovka) köyünde yaşay edi.
Qadınnıñ tanışları haber etti ki, onıñ qorantası maliye tarafından ağır vaziyette buluna, ve ailege yardım etmege çağırdılar.
