Qırımtatar qasabasında «dört prezidentniñ mektebi» milliy olmaycaq

27.10.201617:41
школа на фонтанах

Aqmescitteki Bor Çoqraq (Fontanı) qırımtatar qasabasında mektepniñ qurucılığı yekünlene. Oquv yurtunıñ müdiri endi belgilendi.

Mektepni kelecek sene açmağa söz bereler.

Sentâbr ortasında Qırım paytahtında qapalı toplaşuv keçirildi, bu yerde mektep müdiri belgilendi. Aqmescit memuriyetiniñ reisi Gennadiy Baharevniñ yolbaşçılığındaki komissiya qırımtatar namzetlerinden iç birini saylamadı.

Aqmescit şeer memuriyeti tasil idaresiniñ qararınen, mektep müdiri vazifesine N.M. Bondarenko tayinlendi.

Avdetniñ elde etken malümatına binaen, aynı soyadı ve adını taşığan oca yıllar devamında K.A. Trenev adına 11 sanlı Aqmescit gimnaziyasında riyaziyat (matematika) ocapçesi olaraq çalışa edi.

Bu haber qırımtatar tasil hadimlerini kederletti. Qırımtatar tili taşıyıcısı olmağan müdirniñ tayinlenmesi neticesinde mektepniñ kontseptsiyası da deñişecek, mektep milliy olmaycaq.

Qırımtatar maarif hadimleri birleşmesiniñ yolbaşçısı Safure Kacametovanıñ fikrince, yañı oquv yurtunda başlanğıç sınıflarda qırımtatar tilinde tasil berüv ile bir sınıf açılacaqtır, olarnı yuqarı mektepte episi bir rus tilinde tasil berüvge keçirecekler.

Bor Çoqraq sakinleri içün mektepniñ deñiştirilüvi, yañılıq degildir. Amma o qadar beklegen soñ, er angi mektepniñ açılmasına razılar, dep bildire Crimeantatars.club.

Mektepni aman-aman 25 yıl devamında bekleyler. Onıñ qurulması 1993 senesi başlandı. Qurucılıq işleri de para olmağanı içün toqtatıla edi, de devam etken edi. Qırımda çoq yıl devam etken qurucılıq, «dört prezidentniñ mektebi» dep adlandırıldı – qurucılıq dört ukrain devlet yolbaşçılarınıñ ükümdarlığını kördi. Beşinci prezident – endi rusiyeli prezident – vaqtında mektepni qurıp bitirecek olalar.

Bundan evel Milletlerara munasebetler ve sürgün etilgen vatandaşlar meseleleri boyunca Devlet komitetiniñ yolbaşçısı Zaur Smirnov bunı ilân etken edi: «Bu, Rusiyeli Qırımda qurulacaq ilk qırımtatar mektebi olacaqtır. Qırımtatar milliy renk ve timsallerini akis etmek müimdir. Binada çoq milletli Qırımnıñ tarihı ve adetlerini kösterilmesi istenile. Bu mektep 20 yıldan ziyade qurula edi, ve biz bu işni qısqa vaqıtta bitirmelimiz».

Foto: Milletlerara munasebetler boyunca bölük

Фото аватара

Автор: Редакция Avdet

Редакция AVDET