Safure Kacametova: özüni ürmet etken insan birevniñ eceline quvanırmı?

04.09.201616:54

Nikita Podgornovnıñ İslam Karimovnıñ vefatına yazğan tüşünceleri bizgede tiyip kete degen fikirdem…
Facebookta bu mevzuda yazılarnı oqup — şaştım, eñ ziyade küfür ve çirkin sözlerniñ müellifleri bizimkiler, bir-eki rahmet ketirgenlerni em bazı diger millet vekilleriniñ rahmet munasebetine nisbeten ise,
doğma Tambovlı bir aqıldan ziyade aqıllı jurnalistimiz «hlopçatniki» dep lağap taqtı. Cemaatım, özüni ürmet etken insan birevniñ eceline quvanırmı? Bu dinimizge ve ürf-adetlerimizge doğru kelemi? Accı taqdirimiznen, sabır ve perverligimiz em de birligimiznen dünyağa tanılğan qırımtatarlarğa bu iç yaraşmay. Özbekistandan daa vatanğa qaytalmağan yurtdaşlarımız bar, qabristanlarda qırımtatarlarnıñ mezarlarını özlerinkinden ayırmay temizlep turğan özbek dostlarımız bar, keliñiz — olarnıñ ögünde özümizni aşalamayıq! Özbeklerniñ yurtuna halqımıznı sürgen stalin rejimine özbeklerniñ ne alâqası bar, o vaqıt aç balalarnıñ sırasında yetimler evinde ösken Karimovnıñ bu sürgünlikke ne alâqası bar? Sovet ideologiyası ve küçlü propagandasına ilingen özbekler bir qaç yıldan soñ halqımıznı işkir ve namuslı olğanını körip, bizge nisbeten fikir-munasebetlerini deñiştirgenini bilemiz de… Qardaş türkiy özbek halqınıñ yurtu Özbekistan cumhuriyetiniñ Prezidenti vefat etti!…. Qırımğa qaytacaqta non-patirlernen aq yol tilegen maalle qomşularımız, anda qalğan dost-tanışlarımıznıñ duyğularını ürmet eteyik!
İslam Karimovğa nisbeten hulâsa çıqarmağa olar haqlı, biz degil!

Safure KACAMETOVA

Фото аватара

Автор: Редакция Avdet

Редакция AVDET