Qırımtatar faali Ahtem Çiygoznıñ işi boyunca mahkeme ceryanında tahminen 200 adam sorğuğa çekildi. Olardan tek bir kişi Çiygozğa qarşı deliller ketirdi. Qalğanlar, göñülli halq quvetleri azaları bile, mahküm etilgenge qarşı iç deliller ketirmedi.
Bu aqta ZIK telekanalında Tatyana Danilenko ile FACE 2 FACE programmasında Ahtem Çiygoznıñ adliyecisi Nikolay Polozov bildirdi.
Polozov hatırlattı ki, Ahtem Çiygoznıñ işi boyunca mahkeme ceryanı endi bir yıl devam ete, ve bu vaqıt devamında çoq iş yapılğanını qayd etti.
«Bu vaqıt devamında «Çiygoznıñ işi» boyunca tahminen 200 adam sorğuğa çekildi: zararlanğanlar, şaatlar, bundan da ğayrı, bu mahkemege … Tsekov, Kovitidi, Aksönovnı celp etip oldıq, yaqın künlerde ise, bu vaqialarnıñ esas iştirakçilerinden biri olğan Konstantinovnı da sorğuğa çekecekmiz», – dep ayttı Polozov.
Bundan da ğayrı, adliyeci qayd etti ki, Çiygoznıñ işi boyunca mahkeme mahküm etilgen kişi toplaşuv zalında bulunmadan keçirilgen Rusiyede ilk mahkeme ceryanı ola, dep bildire «Qırım.Aqiqat».
Hatırlatamız ki, Çiygoz içün video bağ quruldı, yani o, mahkeme toplaşuvı keçirilgen vaqıtta o yerde bulunmay, bu ise, adliyeciniñ fikrince, işke oñaytsızlıq ketire.
Bundan da ğayrı, iyül 5-te mahkeme Çiygoznıñ imayesiniñ Qırım müftisi Emirali Ablayevni sorğuğa çekmek muracaatını ekinci sefer red etti.
Hatırlatamız ki, iyül 10-da mahkeme Qırım parlamenti spikeri Vladimir Konstantinovnı sorğuğa çekmege planlaştıra.
Avdetniñ evel bildirgenine köre, iyün 28-de Qırım Yuqarı mahkemesinde yarımada milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ yolbaşçısı Zaur Smirnov qırımtatar faali Ahtem Çiygoznıñ işi boyunca şaat olaraq sorğuğa çekildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
