Tünevin, iyün 10-da, Qırım paytahtında şiddetli sağanaq yağdı, neticede, adet üzre, şeerniñ bazı rayonlarını suv bastı. İçtimaiy ağlar qullanıcıları tarafından yapılğan fotoresimler şaşırmağa devam ete. Biz olarnıñ eñ parlaq soylarını sayladıq.
Yağmur eñ çoq yağğan yerlerde aşayt mahsulatı tükânlarını ve qavehanelerni suv bastı. Eñ evelâ, demiryol vokzalı rayonında, Moskoltso, Pobedı caddesi, bunen beraber, Raketnaya, Kubanskaya, Kiyevskaya ve Tolstogo soqaqları yanında.
Tükânlarnıñ biri saibiniñ sözlerine köre, suv basuvı neticesinde binada bulunğan mahsulat zararlandı. Onıñ bildirgenine köre, zarar tahminen 50 biñ ruble teşkil etti. Bu, çeşit türlü aşayt ve konditer mahsulatı.
Aqmescit demiryol vokzalı yanında bir qaç qaza qayd etildi, bir qaç trolleybus, avtobus ve maşna suvda qaldı. Olarnıñ bazıları endi tamirge muhtac, dep bildire «Qırım.Aqiqat».
Avdetniñ evel bildirgenine köre, iyün 10-da yağğan şiddetli sağanaq neticesinde Aqmescitniñ (Simferopol) bazı rayonlarını suv bastı. Bazı yollarda suv seviyesi avtomobillerniñ klirenslerine qadar yetti. Qırım Fevqulade vaziyetler nazirligi matbuat hızmetiniñ malümatına binaen, şeerde yağğan sağanaq neticesinde bazı rayonlarnı suv bastı, amma fevqulade vaziyet olmadı.
Foto: Avtopartner Krım, Tipiçnıy Simferopol, Fevqulade vaziyetler nazirligi Qırım idaresiniñ matbuat hızmeti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
