Dekabr 19-da Türkiyede Rusiye elçisi Andrey Karlovğa ücüm etildi. Onı sırtına bir qaç atışnen öldürdiler.
Karlovnı öldürmezden evel, belli olmağan şahıs avağa attı.
«Soñra Aleppo aqqında, Süriye aqqında nasıldır sözler qıçıra edi. Soñra Karlovğa attı. Karlov yıqılğan soñ, o, er kesni çıqmağa, binanı boşatmağa çağırdı, soñra tabanda yatqan Karlovğa bir qaç kere attı», – dep añlattı türkiyeli mühbir Abdurrahman Kambur-oğlu, qaysı biri Rusiye elçisi öldürilgen yerde bulunğan edi.
Onıñ sözlerine köre, ücümci özüni sanki vatandaş urbalı bekçi olaraq ya da Karlovnıñ şahsiy muafızı olaraq alıp barğan edi – elçi sözde bulunğan vaqıtta tamam onıñ artında turğan edi.
Mühbir Osman Paşayevniñ Facebook saifesinde bildirgenine köre, elçini 22 yaşındaki politsiya hadimi, Türkiye vatandaşı Mevlüt Mert Altıntaş öldürdi. O, zemaneviy sanat merkezine sergige kirgende politsiya şahısnamesini kösterdi, bunıñ içün şübe doğurmadı. Genç insan atıştan soñ ayttı ki, binadan sağ çıqmaz. Teraktnı Rusiyeniñ Aleppodaki areketleri içün ceza dep adlandırdı.
Paşayevniñ malümatına binaen, Karlov Türkiyege elçi vazifesine 2013 senesi yazda tayinlendi.
«Elçiniñ ilk diplomatik muvafaqiyetlerinden biri – 2013 senesi sentâbr ayında Antalyada keçirilgen «Altın portaqal» kinofestivalinde «Haytarma» filmine iştirak etmege bermegenidir. Karlov 2015 senesi noyabr ayında yüz bergen uçaq buhranından soñ Rusiye ve Türkiye arasındaki munasebetlerni eyileştirmek içün çoq şey yaptı. Bu sene yazda o, şahsen türk iş adamlarını toplap, olarnı Qırımda Keriç köprüniñ qurulmasında iştirak etmege çağırdı», – dep yazdı Osman Paşayev.
