Ukraina Televizion ve radio yayınlama meseleleri boyunca Milliy şurası rusiyeli «Dojd» telekanalınıñ yayınlamasını ukrain qanunları bozulğanı sebebinden yasaq etti.
Milliy şura azası Sergey Kostinskiyniñ sözlerine binaen, yasaqnıñ sebebi, Ukraina topraq bütünligini bozğan malümatnıñ yayınlaması oldı – Telekanal Qırımnı Rusiye territoriyası olaraq köstere.
Bundan da ğayrı, Ukrainada yayınlama yasaqlanmasınıñ daa bir sebebi bar. «Volâ» provayder-ortağı temsilcisiniñ malümatına binaen, devlet territoriyasında kanalnıñ yayınlanması onıñ yayınında ticariy reklama olğanı içün yasaq etildi.
Ukraina qanunlarına binaen, ecnebiy telekanallarnıñ yayınında, Avropa birligi devlet-azalarınıñ telekanallarından ğayrı, reklama yerleştirüvi yasaqtır.
«Dojd» baş müdiri Natalya Sindeyevanıñ sözlerine köre, telekanal, Rusiye haritanı köstergende, rusiyeli qanunlarğa esaslana.
«Rusiye Federatsiyası Anayasasınıñ 65-ci maddesine binaen, Qırım Cumhuriyeti Rusiye Federatsiyasınıñ subyekti ola», – dep qayd etti «Dojd» baş müdiri Natalya Sindeyeva.
Bundan evel Ukrainada 60-tan ziyade rusiyeli kanalnıñ yayınlanması yasaq etildi ya da sıñırlandı. Bulardan 14 kanal, bu cümleden, «Pervıy kanal» («Birinci kanal»), NTV, «Rossiya-1», RBK, «Ukrainada cenk ve zorbalıq teşviqatını alıp barğan rusiyeli telekanallar yayınlanmasınıñ vaqtınca yasaq etilüvi saasında qanunlarğa riayet etüvni nezaret etmek maqsadınen» yasaq etildi. Kanallarnıñ bazıları ticariy reklama yayınlağanları içün yasaqlandı. Rusiye Tışqı işler nazirligi temsilcisi Mariya Zaharova söz berdi ki, «Dojd» telekanalınıñ söndürilmesi aqqında malümat kerçek olsa, müessise OSCE-ge muracaat etecek.
Ukrainanı bu telekanalnı tahminen 90 provayder yayınlay.
