Dekabr 9-da Aqyar (Sevastopol) civarındaki Mamaşay (Orlovka) köyünde uquq qoruyıcı organlarınıñ hadimleri cuma namazından soñ Vâzovaya roşça qasabasındaki camige sürip kirdi ve musulmanlar gruppasını çıqarıp, Qaçı politsiya bölügine alıp ketti.
Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde bildirdi.
Qırım müftiyatında (QMDİ) Avdetke bu malümatnı tasdıqladılar, amma qayd ettiler ki, işbu cami «iç bir yerde qayd etilmegen, QMDİ-niñ mülkü olmay, anda kim toplaşqanı ve imamı kim olğanı belli degil».
Müftiyatnıñ matbuat hızmetiniñ bildirgenine köre, Vâzovaya roşça kompleksi 1990-ci senelerniñ soñunda – 2000-ci seneleri başında rusiyeli oligarhlar, hususan yırcı Alsunıñ babası Rinat Safin tarafından quruldı. Qırımlı «rublövka» territoriyasında kiçik cami da quruldı, onıñ üstünde bu mescitni Rinat Safin bağışlağanı aqqında qayd etilgen.
