Yalta medeniyet merkeziniñ damı tamir etilgen soñ, bina odalarını suv basa. Bunıñ sebebi, «Krımstroymontaj» şirketi tarafından alıp barılğan ğayrı keyfiyetli tamir işleri oldı.
2016 senesi Yalta medeniyet merkezinde soñki yıllar devamında ilk sefer büyük dam tamiri yapıldı, bundan soñ ise, 5-ci qattaki odalarnıñ tamiri yapıldı.
Medeniyet merkezi binasınıñ damı bir qaç yıl devamında aqa edi, odalarda ve koridorda tamir işleri yıllarca alıp barılmağan edi. 2012 senesiniñ soñunda, Rudanskogo soqağı, 8 adresi boyunca yerleşken bina merkezniñ mülkiyetine keçirilgen soñ, icat taqımları iştirakçileriniñ küçünen yengil tamir işleri alıp barıldı.
Yalta memuriyetinde bildirdiler ki, işni yapacaq şirket, iş içün eñ az para alğan şirket olaraq saylanıldı.
Şimdiki vaqıtta merkezniñ büyük zalı qapalı, çünki onıñ qullanılması dam aqqanda havflıdır. Tehnika polietilen ile qapatıla, binanı daima bir qaç insan baqa.
«Nevbetçiler bile ki, gece turmaq, yağmur yağsa, qopqalarnı tökmek kerek. Bütün cıyıştırıcılar işniñ birinci saatında büyük zalğa kelmek, suvnı çıqarmaq ve tabannı sürtmek kerek. Elektrik er vaqıt kire, qısqa tutaşuv olmasın dep baqa», – dep añlattı Yalta merkeziy klub sistemasınıñ müdiresi Yelena Belâyeva.
Zal qapalı olğanı sebebinden, icadiy taqımlarnıñ repetitsiyaları kelişmegen şaraitte keçirile: meselâ, yerli tsirk artistleri hollda ya da odalarda meşğuliyetlerini yapa.
Şeer akimiyeti işni ömürge keçirgen şirketke qarşı mahkemede dava açacaq ola, ve söz berdi ki, onı şeerde bu kibi işlerniñ yapılmasına yibermeycek. Damnıñ tamir etilmesi içün diger şirketni tapacaq olalar.
Yalta medeniyet merkezinde balalar ve büyükler içün 23 icadiy taqım çalışa: halq, klassik ve zemaneviy horeografiya, akademik ve halq vokalı, teatr, tasviriy, dekorativ-ameliy ve fotoresim sanatı. Umumen olaraq, merkezge tahminen 600 şegirt kele.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
