Qırım paytahtında Sevastopolskaya soqağında tamir işleri alıp barılğan soñ, yol ve qaldırımlar daa keñ olacaq, yoq etilgen terekler yerine yañı terekler oturtılacaq.
Bu aqta Aqmescit memuriyeti yolbaşçısınıñ birinci muavini Sergey Krutsük bildirdi.
«Danilov soqağından Aqmescitten çıqışqa qadar daa bir yol qoyula. Şimdilik Qırım Naqliye nazirligi ile reversiv yollarnıñ yapılmasını baqamız: saba kiriş, aqşam çıqış içün yol. Danilov soqağında, böyle yol yapıla bilecek yerde, şeerden qolay çıqmaq içün yol keñleştirile. Bunen beraber, Zalesskayadan Gavena soqağına qadar yol keñleştirile… Qaldırımlar da keñleştirilecek», – dep añlattı Krutsük.
Bunen beraber, o qayd etti ki, tamir işleri noyabr ayınıñ soñunda yekünlenecek, çünki büyük işniñ alıp barılması kerek.
«Kommunal ağlar, trolleybus kontakt ağları keçirilmek kerek. İş, kerçekten de, çoq», – dep qayd etti Krutsük.
Onıñ sözlerine binaen, yolnı keñleştirmek maqsadınen yoq etilgen terekler yerine yañı terekler oturtılacaq, dep bildire «RİA Krım».
Foto: Vladislav Sergiyenko