«Fevral 26» işi boyunca qabaatlanğan Ali Asanov uzun vaqıt içinde ilk sefer balalarını kördi ve olarnen biraz laf etti bile. Körüşüv, oktâbr 3-te keçirilgen «fevral 26» işi boyunca mahkeme toplaşuvında oldı.
Bu aqta Ali Asanovnıñ adliyecisi Edem Semedlâyev bildirdi.
Bunen beraber, o qayd etti ki, onı adliyeci olaraq toplaşuv keçirilecegi aqqında haberdar etmediler bile, onıñ yerine belgilengen imayeci davet etildi. Esnasnıñ diger iştirakçileri, onıñ keçirilmesinden eki kün evel haber aldı, Ali Asanov ve Mustafa Degermenci ise, olar Aqmescit Merkeziy rayon mahkemesine alıp ketirilecegi aqqında aqşam bildi. Uquqçı buña Cinaiy-esnas kodeksiniñ bozuluvı olaraq qıymet kesti.
«Mahkemeci, Asanov ve Degermenciniñ apiste bulunma müddetiniñ devam ettirilmesi aqqında prokurornıñ şefaat arizasını baqmağa başladı, amma adliyeci Solodkov A.Ye. mahkemege bildirdi ki, o, azırlıq toplaşuvınıñ keçirilmesi aqqında şefaat arizasını bergen edi, bundan soñ mahkemeci 07.10.2016 s. qadar teneffüs ilân etti. Amma mahkeme «Taraflar, mahkeme toplaşuvınıñ keçirilecek yeri, künü ve vaqtı aqqında onıñ başlamasından eñ azdan 5 kün evel haberdar etilmeli» RF Cinaiy-esnas kodeksiniñ 231 maddesi 4-ci qısmını kene de bozdı», — dep ilân etti Semedlâyev.
Avdetniñ bildirgenine köre, 2016 senesi iyül 20-de mahkeme «fevral 26» işini ve bu iş boyunca qabaatlanğan daa beş kişini ayırmağa qarar aldı. Böyleliknen, Mustafa Degermenci, Ali Asanov, Arsen Yunusov, Eskender Emirvaliyev, Eskender Kantemirovnıñ dava işi Aqmescit Merkeziy rayon mahkemesinde baqılacaq, Ahtem Çiygoz boyunca iş ise, Qırım Yuqarı mahkemesinde qalacaq.
Hatırlatamız ki, Qırımnıñ İçki rayonındaki Ferngeym (Urojaynoye) köyü sakini Ali Asanov 2015 senesi aprel 17-de yaqalandı. Taqiqatnıñ noqta-i nazarına binaen, o, 2014 senesi fevral 26-da Qırım parlamenti binası yanında keçirilgen miting neticesinde yüz bergen kütleviy nizamsızlıq istirakçisi oldı. Belli olğanına köre, Ali Asanov, dört balanıñ babası ola, olarnıñ eñ kiçigi, babası SİZO-da bulunğan vaqıt doğdı.
