Doquz yaşındaki Qırım sakini Kamile Eyupova «Rusiyeniñ kiçik istidatları» Bütün Rusiye prestij bala festivalinde birinci yer qazandı.
Bu aqta «A&T Fashion Studio» model ve oyun bala studiyasınıñ reberi Tatyana Horoşaya bildirdi.
Kamile Eyupova dört yıldan başlap, oyunnen oğraşa ve «Qırım Çempionı» bile oldı. Şimdiki vaqıtta o, «A&T Fashion Studio»ğa qatnay.
Qız, 8-11 yaşındaki iştirakçiler kategoriyasında festivalnıñ baş unvanını aldı – «Gran-pri Rusiyeniñ kiçik istidatları». Bunen beraber o, «Milliy kostümniñ eñ yahşı taqdimi» mukâfatında ğalebe qazandı, dep bildire «AN – Krım».
Milliy urbalı er iştirakçi özü ve yaşağan yeri aqqında añlatmaq kerek edi.
«Büyük iş yapıldı! Amma eñ esası şu ki, bizim merkezimizden qıznı kördiler ve endi halqara, eñ küçlü ve belli dünya bala festivallerinden biri olğan «Little Miss World» yarışına davet etildi. Kelecek festival 2017 senesi sentâbr ayında keçirilecek», – dep añlattı Horoşaya.