Qırım adliyecileri Emil Kurbedinov ve Edem Semedlâyevge tintüv vaqtında alınğan tehnika qaytarıldı.
Bu aqta Kurbedinov «Radio Svoboda» mühbirine bergen izaatında bildirdi.
«Bilgisayarda tapılğan malümat ve vesiqalar aqqında sorağan ediler. Bularnıñ (vesiqalarnıñ – Avdet) episi zenaat faaliyetimnen bağlı, ekspertizalarnen beraber dava malümatlarında buluna», – dep añlattı adliyeci.
Avdetniñ evel bildirgenine köre, yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.
Amnesty International halqara uquq qoruyıcı teşkilâtı Emil Kurbedinovğa qol tutqanını kösterdi ve onıñ azat etilmesini talap etti. Bundan da ğayrı, rusiyeli adliyeciler oña destek köstergenini bildirgen açıq mektüp ile muracaat etti.
Emil Kurbedinov yaqalavdan azat etilgen soñ haber etti ki, Qırım musulmanlarını imaye etüv boyunca işini devam etmege niyetlene.
Fevral 15-te adliyeciler Emil Kurbedinov ve Edem Semedlâyevge Qırımda Ekstremizmge qarşılıq boyunca merkezden celpnameler keldi.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
