Ukraina prezidenti tarafından imzalanğan ‘Ukraina mukâfatları ile din hadimlerini taqdirlevi aqqında’ qararı ile Ukraina mustaqilliginiñ 18 yıllığı munasebetinen 30 din hadimi şu cümleden Qırım Müftisi Emir-Ali Ablayev de taqdirlengeni kütleviy haber vastalarında sebepsiz qalabalıq ve yañlış haberlerlerge yol berdi. Eñ başta ‘Vozrojdeniye’(‘Tiklenüv’) adlı qanundan tış olğan siyasiy firqanıñ gazetasında, soñra da bizim ‘Qırım sedası’, ‘Poluostrov’ kibi belli gazetalarımızda ‘Qırım Müftisi Prezidentniñ elinden haç şeklinde orden ile mukâfatlandı’ kibi haberler basıldı. ‘Poluostrov’ gazeta sanlarınıñ birinde ilk saifesinde Ukraina Prezidenti Qırım Müftisiniñ elini tutqanı köstergen 2-yıl evel çıqarılğan foto resim, tübünde ‘Viktor Yuşçenko Müftini taqdirledi’ degen yazısı ile ve şu fotonıñ tübünde haç şeklinde ordenniñ resmi de basılğan edi. Soñra ise adamlarnıñ çeşit fikirleri, aqaretli qaydlar, hristian adetlerine boysunuv ve şaraitke qarşı çıquv kibi iftiralar yer aldı.
Çeşit sektalar neşirlerniñ Müftiyatqa qarşı çıqqanları çoqtan bellidir, amma bizim sayğılı gazetalarımız bu mukâfat ile bağli suallerni çezmek içün Müftiyatqa atta muracaat etmegenleri, ya da müftinen şahsen körüşmege atta tırışmağanları ayrette qaldıra. Öyle körüne ki, sanki ‘Qırım sedası’ ve ‘Poluostrov’ gazetaları içün internet — yekâne haber menbası olıp qaldı.
Yuqarıda aytılğanına binaen, şunı haber etmege zarur dep sayamız ki, Qırım müftisi Ukraina Prezidentniñ elinden bir de bir mukâfatnı, şu cümleden añılğan ordenni alğanı yoq. Bundan da ğayrı, Müftiyat mezkür mukâfat aqqında haberni, aynı şu gazetalar kibi, internet vastasınen aldı. Bir-de-bir vesiqalar, ya da mukâfatlar Müftiyatqa kelgeni yoq. Olmağan şeylerniñ kösterüvi, Müftige qarşı yollanğan aqaretlerden çorlanmaq mümkün. Öz menlik ve namusını qorçalamaq içün Müftiy endi Ukraina mahkemesine muracaat etmege mecbur olacaqmı? Mezkür gazetalarımız sensatsiya peşinden çapqalap kerçekten uzaq olğan, yañlış haberler ve kelişmegen fotolarnı qırımtatar oquyıcılarnıñ ögüne sürmege devam eteceklermi?
Müftiniñ formal mukâfatlandıruvı oquyıcılarğa şeriattan çekilüv kibi kösterilse, Qırım Müftisi öz tarafından gazetlerniñ jurnalistleri ve muarrirlerini Quran ayetine riayet etmege çağıra: ‘Olarğa havfsızlıq, ya da havf aqqında haber kelse, olar (teşkermeyip ve ardını tüşünmeyip) şu daqqası onı darqatalar. Amma olar onı Peyğamberge, ya da akimiyet saiplerine aytsa ediler, bu haberni, onıñ manasını añlap olğanlar bilir edi. Ve Allahnıñ rameti olmasaydı, siz, bazılardan ğayrı, şeytan artından keter ediñiz.’
Ondan da ğayrı, bizim matbuat neşirlerimizge insan ve jurnalist etikasınıñ elementar normalarına riayet etmelerini rica etemiz.
Qırım Musulmanları Diniy İdaresiniñ matbuat hızmeti