“SAFDAŞ” içtimaiy teşkilâtlarnıñ Qırım birleşmesi, demokratik içtimaiy teşkilâtlarnen birlikte, Qırım Yuqarı şurasına yüz bergen stalinizm, faşizm zeiniyeti adiseleriniñ ögrenilmesi boyunca ükümet komissiyasını tesis etmek ricasında bulundılar.
“SAFDAŞ” birleşmesinde soñki vaqıtta faal olğan faşizm ve stalinizm ideologlarnıñ areketlerinen raatsızlanalar. Böyle, 2009 senesiniñ 21 dekabr künü Yalta şeerinde stalinizm tarafdarları meşal yürüşini teşkil ettiler. Kommunistler yolbaşçısı L.Graç İ.Stalinge eykel qoymaq teşebbüsınen çıqışta bulundı. “Totalitar rejimi mirasçılarnıñ bu ve başqa cinaiy areketler böyle kibi adiselerniñ toqtatılması boyunca işler kerekli derecede alıp barılmağanını köstereler, bu stalinizm ve neofaşizm zeiniyetiniñ keñişletmesine yol aça”, — qayd eteler birleşmeniñ azaları, ve episi bu – halqara demokratik institutları tarafından cinaiy ideologiya retsedivlerini qabaatlamağa ve devletlerniñ içtimaiy-siyasiy ayatından çıqarmağa çağıruvlarını diqqatqa almamanıñ neticesi olğanını aytalar.
Bu sebepten, “SAFDAŞ”, demokratik içtimaiy teşkilâtlarnen birlikte, yüz bergen stalinizm, faşizm zeiniyeti adiseleriniñ ögrenilmesi boyunca ükümet komissiyasını tesis etmek ricasında bulundılar, em de PA OBSY’nıñ 2009 senesiniñ 3 iyul künü qabul olunğan “XXI asırdaOBSY regionında insan aqları ve vatandaş serbestliklerini rağbetlendirüv” Rezolütsiyasınıñ tevsiyelerini közge alıp areket etmek.
Malümat. OBSY Parlament Assambleyası tarafından 2009 senesi 3 iyul künü Vilnüs şeerinde “XXI asırdaOBSY regionında insan aqları ve vatandaş serbestliklerini rağbetlendirüv” Rezolütsiyası qabul olundı, o, totalitar rejimleriniñ siyasetini qabatlamaq ve aldını almaq çağıra, insanğa qarşı cinaiy ideologiya ve rejimlerniñ ömürge keçirilmelerini aldına alması içün esas yonelişlerni belgiledi.
Malümat. “SAFDAŞ” içtimaiy teşkilâtlarnıñ Qırım birleşmesi Qırımtatar Milliy Qurultaynıñ II sessiya V çağıruvı keçirilmesine azırlıq çerçevesinde teşkil olundı. Onıñ terkibine “Arqdaş” aqqorçalayıcı teşkilâtı, “Diyar” milliy-medeniy cemiyeti, “Köydeşler” qırımtatar teşkilâtı, “Salğır Baba” müsülman cemiyeti ve başq. Bileşme kollegiallik printsipine esaslana.
QHA
ARİZA
“SAFDAŞ” içtimaiy teşkilâtlarnıñ Qırım birleşmesi “Köydeşler” Qırım cumhuriyet teşkilâtnıñ İ.V.Stalinniñ 130 yıllığına bağışlanğan 21 dekabr künü Yalta şeerindeki meşal yürüşiniñ teşkilâtlandırması ve yolbaşçılıq etkeni içün, Simeiz orta mektebiniñ müdiri V.Rafoloviçni vazifesinden boşatmaq talabı ile yalta şeerinde aktsiya ve mitinglerniñ keçirilmesi aqqında teşebbüsini baqıp çıqtı.
“SAFDAŞ” içtimaiy teşkilâtlarnıñ Qırım birleşmesi qayd ete:
- Qırmtatar halqınıñ GENOTSİDİ, siyasiy repressiyaları, devletçiliginiñ yoq etilmesi, sürgüni, açlığında İ.Stalin tarafından qurulğan totalitar rejim qabaatlıdır.
- Belgilengen rejim umumen Ukrain halqına qarşı devlet terrorınıñ esasıdır bütün rejimniñ devamında.
- Totalitar rejiminiñ mirasçıları onıñ reanimatsiysına yonelgen cinaiy areketlerini maniasız devam eteler.
“SAFDAŞ” içtimaiy teşkilâtlarnıñ Qırım birleşmesi “Köydeşler” Qırım cumhuriyet teşkilâtınen bütünley razı ve olarnıñ teşebbüslerini özüniñ olaraq saya.
“SAFDAŞ” içtimaiy teşkilâtlarnıñ Qırım birleşmesi icra kâtipke PA OBSY’nıñ 2009 senesiniñ 3 iyul künü qabul olunğan “XXI asırdaOBSY regionında insan aqları ve vatandaş serbestliklerini rağbetlendirüv” Rezolütsiyası işletilmesi içün ükümet tedbirlerini talap etken arizanı azırlamağa ve QMC Yuqarı Şurasına yollamağa avale ete.
“SAFDAŞ” kollegiyası