Mecliste OBSYe Baş Komissar hadimlerinen körüşüv olıp keçti.

11.05.20160:19

1 avgust künü Mecliste qırımtatar meclis reisi Mustafa Cemilev OBSYe Baş komissarnıñ milliy azlıqlar boyunca üyken mesleatçısı Aleksandr Vinnikov ve adliye meseleler boyunca mesleatçısı Vinsent de Graafnen körüşti.

Körüşüvde Bütündünya qırımtatar kongressiniñ prezidenti Refat Çubarov, Meclisniñ tış bağlar bölüginiñ yolbaşçısı Ali Hamzin ve Meclis kãtipliginiñ yolbaşçısı Zair Smedlãyev iştirak ettiler.

Körüşüvniñ esas mevzusı- qırımtatar halqınıñ öz Vatanlarında haqlarını tiklev ve Ukrainada havfsızlıq ve inkişaf kefaletlerini temin etilmesi boyunca Halqara forumnıñ azırlanması oldı.

Belli olğanı kibi, halqara forumnı keçirmek ğayesi ilk sefer Aqmescitte 2010 senesi 18 mayıs künü Bütünqırım matem mitingniñ rezolütsıyasında ilãn etilip, soñra munasip qarar 2010 senesi 29 avgust künü 5 qırımtatar Qurultayınıñ 3 sessiyasında qabul olunğan edi.

‘Meclis yolbaşçılığınıñ Almaniya, Kanada, Poloniya, AQŞ, Türkiye, bir çoq diplomatkk temsilciliklerniñ yolbaşçılarınen körüşüvleri subetdeşler Halqara forumnı keçirmek ğayesine qoltutqanlarını numayış etti. Biz bu meseleni faal muzakere etmege devam etip, Ukrain akimiyeti tarafından da destek körmege ümüt etemiz.’- dedi Meclis reisi Mustafa Cemilev.

 

Meclis reisiniñ birinci muavini Refat Çubarovnıñ aytqanına köre, ukrain akimiyeti tarafından bu meselege dair qararlarınıñ uzatılması teşkiliy protsesslerni sıñırlay, ayrıca da forumnı keçirmek tarihını, yerini vaqtını, kün tertibini belgilemesi sozulmaqta. ‘Bu cehetten biz halqara institutlarını ve eñ-evelã milliy azlıqlar boyunca OBSYe Baş Komissarnı destek köstermelerini rica etemiz,’-dedi Refat Çubarov.

OBSYe Baş Komissarnıñ uyken mesleatçısı Aleksandr Vinnikovnıñ aytqanına köre, ofisleri Qırımda yer alğan bütün esnaslarnı diqqatnen közete. ‘Körüşüvimizniñ neticeleri aqqında OBSYe Baş komissarı Knut Vollebekni tafsilãtlıca haberdar etermiz. Bizim içün Halqara forumnı keçirmek sebepleri, ayrıca da halqara cemaatçılığınıñ Ukrainanen beraber qırımtatar meselesinde iştirak etmek zarurlığı meraqlıdır.

Körüşüv devamında muzakere etilgen mevzulardan OBSYe Baş Komissarnıñ ofis hadimleri Qırımda olıp keçken vaqialarğa, ayrıca da Kefe yanında secde hacını tiklemek tırışqanlarına diqqat ayırdılar. Ali Hamzin ve Zair Smedlãyev Qırımda kazakiler iştiragı ile yüz bergen vaqialarınıñ aqiqiy sebeplerini aydınlattılar.

Körüşüv devamında topraq meseleleri de köterildi.

Qırımtatar Meclisi işbirlikke azır.