1 fevral künü QHA matbuat merkezinde Sovet Birliginiñ eki defa qaramanı Amet-Han Sultannıñ facialı vefatına 41 yıl tolması munasebetinen matbuat-konferentsıya olıp keçti. Tedbir devamında Aqmescit aeroportına başqa ad bermek meselesi muzakere etildi.
Konferentsıyada ‘Vatan qanatları’ teşebbüs aviatorlar gruppasınıñ reisi Nuri Beytullayev ve onıñ muavini Alim İrih iştirak ettiler.
‘Vatan qanatları’ teşkilãtınıñ reisi jurnalistlerni mezkür mesele boyunca yapılğan işler aqqında, şu cümleden Qırımnıñ çeşit akimiyet organlarına yollanılğan muracaatlar aqqında haberdar etti. Aqmescit aeroportına Amethan Sultan adını qoymaq teşebbüsi Qırım ve ukrain cemaatçılığında keniş darqalıp, destek qazanğanını qayd etti.
Matbuat-konferentsıya iştirakçileriniñ fikrine köre, Qırım akimiyet organlarından alınğan cevaplar ğayet alçaq seviyededir. Beytullayev Qırım Yuqarı Şurasınıñ istisal, qurucılıq, naqliye, bağ ve yaqarlıq-energetik kompleksi boyunca daimiy komissiya reisiniñ birinci muavini Pötr Zaytsevniñ Aqmescit aeroportına A. Sultan adını qoymaq meselesi yerli referemdumda çezilmesi aqqında, ve Qırım naqliye ve bağ Cumhuriyet komitet reisiniñ Aqmescit aeroportına A.Sultan adı berilse ‘ucaqlarnıñ yolunı köstergen lotsman haritaları’nı deñiştirmek zarurlığı aqqında beyanatlarınıñ manasızlığını añlattı. Ukraina qanuncılığı ulu insanlarnıñ adlarını berüv boyunca referendumlarını keçirmesini közde tutmağanını ve añılğan ‘lotsman haritalar’ zaten yoq olğanını tasdiqladı. ‘Bütün ucaqlar mahsus kodlar boyunca uçalar. Hiç bir normal aviator bir aeroportnı başqasınen qarıştırmaz. Meselã, kimse Türkiyedeki ‘Trabzon’ aeroportını Braziliyadaki ‘Tarbzon’ aeroportınen qarıştırmaz.’- dedi N.beytullayev.
Bundan da ğayrı, Beytullayevniñ fikrine köre, işbu mesele diskriminatsıon mizacını taşıy. ‘ Bu mesele alã çezilmegenine başqa cevap tapıp olamaymız. Bu yerde milliy alãmetke köre diskriminatsıya yüz bergeni körüne. Musbet qarar alınması peşinden artıq 3 yıl devamıda ğayret kösteremiz. Yanvar ayında biz akimiyetke 3 muracaat yolladıq. Müsbet cevap almasaq, dünya cemaat qurulışlarına muracaat etmege mecbur olacaqmız.’- dep añlattı N.Beytullayev.
Tedbirniñ soñunda ‘Vatan qanatları’ gruppanıñ reisi aeropot adınıñ deñiştirüv teşebbüsi qırımtatar milletçiliginiñ kösterilmesi deigldir dep añlattı. ‘ Biz aeroportqa Amet-han Sultannıñ adını o qırımtatar olğanı içün degil de, ulu uçucı, Qırım tamırlı olğanı içün qoymaq isteymiz. Bu ulu uçucınıñ soyadı Nikolayev, Petrenko, Liberban olsa bile biz aynı böyle yapar edik. Amet-Han Sultan ulu uçucı edi. O insanlarnı rus, ukrain, qırımtatarlarğa bölmey edi, biz de öyle davranmalımız. Bizim böyle qaramanımız olğanı içün ğururlanmalımız’-dep qayd etti o.
Azırladı Elmara Mustafayeva