Milliy Meclis keçken saylavlarğa sert qıymet kesecek

11.05.20160:19

13 noyabr künü Milliy Meclisniñ nevbetteki toplaşuvı olıp keçti, onıñ esas suali yerli saylavlar neticelerniñ muzakeresi ve QMc Yuqarı Şurası terkibinde Qurultay-Ruh fraktsiyasınıñ işi oldı. Oturış, adet üzre olğanı kibi, sıcaq disskusiyalar içinde keçti, amma buna baqmadan Meclis azaları çezüvniñ kompromiss yollarını tapıp oldılar.

Meclis reisiniñ birinci muavini Refat Çubarov haber etkeni kibi, şimdi saylav komissiyası regional meclislernen sıq işbirligi ile Qırımnıñ er bir regionğa dair saylav neticeleri boyunca malümat azırlamaqta, soñra bu malümat esasında saylav neticeleriniñ teren talilini etip, buna ketirgen sebepler ögrenilir. Meclisniñ bazı azaları öyle fikir bildirdiler ki, saylavlarda ayrı şahıslarnıñ faaliyetine qıymet kesmek kerek, hususan qırımtatararnıñ öz-özüni idaresinde işitrak etkenlerniñ.

Umumen, Birinci muaviniñ sözlerine köre, saylav komissiyasınıñ azaları saylav neticelerinen memnün degiller, çünki neticeler daa da yahşı ola bilecek ediler. Hususan, o qayd etti ki, Narodnıy Ruh Ukrainı fraktsiyası cedvellerinden keçken Quurltay tarafından tevsiye etilgen namzetlerge ğalebe içün bir qaç rey yetişmegeni adiseler de bar edi. Böyle vaziyetniñ sebepleri, ilk evelâ, Milliy Meclis ve Qurultayğa qarşı çıqqan, başqa partiyalar cedvellerinde olğan qırımtatarlarnıñ işitragidir.

Amma Qırımnıñ ayrı rayonlarında alçaq neticeler regional meclisler azalarnıñ kerekli derecede olmağan faaliyetleri ya da areketsizlikleri neticesinde oldı.

Ayrıca Refat Çubarov qırımtatarlarnıñ saylavlarğa qatnaşuvları alçaq seviyede olğanını qayd etti, bazı uçastkalarda 25-70 % teşkil etti, bu meseleni ögrenmek kerekligini ayttı.

 

Ondan da ğayrı, Meclisniñ oturışında QMC YŞ’nıñ olacaq sessiyalarında qurultay-Ruh fraktsiyasınıñ areketleri aqqında sual muzakere etildi, sessiya salı künü 16 noyabrde başlanacaq. Evlden berilgen malümatlarğa köre, Qırım ükümetiniñ deputatları başta yolbaşçılıqnı saylarlar ve QMC Yuqarı Şurasınıñ iş qurumlarınıñ terkibini şekillendirecekler, em de Nazirler şurasınıñ yolbaşçısını saylarlar, ekinci künü ise Qırım ükümetiniñ şekillendirüvini başlarlar.

Milliy Meclis reisi Mustafa Cemilevniñ sözlerine köre, Milliy Meclisniñ yolbaşçılığı cumhuriyet yolbaşçılığınen körüşti, hususan, QMC YŞ reisi Vladimir Konstantinov ve Nazirler şurasınıñ yolbaşçısı Vasiliy Cartınen. Körüşüvde Yuqarı Şura ve Nazirler Şurasınıñ terkibine vazifeler tayin etilüvi muzakere etildi, ve bir sıra başqa meseleler de baqıldı.

Meclis Reisi qayd etkeni kibi, Yuqarı Şurasınıñ çoqluğını RP teşkil etip, QMC akimiyet qurumlarında vazifeler belgilendi. Qurultay-Ruh fraktsiyası cumhuriyetiniñ akimiyet qurumlarındaki bir sıra pozitsiyalarını almaq niyetindedir.

Narodnıy Ruh Ukrainı partiyasınıñ deputatlarınıñ teklifi ile, Milliy Meclis Qurultay-Ruh fraktsiyasınıñ yolbaşçılığı tasdiqlandı: reis – Refat Çubarov, reis muavini Leonid Pilunskiy, kâtip – Remzi İlyasov. Ondan da ğayrı, Meclisniñ qararına köre fraktsiya böyle poziyatsiyalarnı qorçalacaq: QMC YŞ vitse-spikeri (Refat Çubarov), Milletlerara munasebetler ve sürgün etilgen vatandaşlarnıñ meseleleri boyunca daimiy komissiyasınıñ reisi (Aziz Abdullayev), QMC’niñ malümat boyunca cumhuriyet komitetiniñ reisi (Şevket Memetov), Milletlerara munasebetler ve sürgün etilgen vatandaşalr işleri boyunca QMC’niñ cumhuriyet komitetiniñ reisi (Edem Dudakov), QMC Medeniyet ve sanatlar naziriniñ muavini (Server Kakura), em de Qurultay vekilleriniñ endi alğan nazirler muavinleri vazifeleridir.

Meclisniñ oturışından soñ “Şen” salonında Milliy Meclisniñ saylanılğan deputatlar ve yerli şuralar başlarınen körüşüvi olıp keçti. Milliy Meclis Reisiniñ birinci muavini Refat Çubarov qayd etkeni kibi, bu körüşüvniñ maqsadı – qırımtatar halqı temsilcileriniñ özara tanışuvı, em de Milliy Meclis ve yerli şuralar deputataları arasındaki işbirlikniñ belli formatını işlep çıqarılmasınıñ zarurlığıdır.

Körüşüvler ile bereketli olğan kün Milliy Meclis Reisi Mustafa Cemilevniñ hayırlavı ile yekünlendi.