2010 senesi 21-inci iyulde Aqmescitte, qırımtatarlar yaşağan, eñ büyük qasabalarından biri, Bor-Çoqraqnıñ (Fontanı) temel qoyulmasına yigirmi yıl toluvı munasebetinen tantanalı tedbirler ötkerildi.
Kündüz saat 17-de, tantanalı tedbirniñ açıluv merasimine qasabanıñ yüzlerce sakin ve musafirleri toplandı. Olarğa bu munasebet ile büyük çadır altında bayram sofraları donatıldı. Bu vaqıtqa yaqın, çadır yanında evelden azırlanğan, tatlar ile örtülgen, sport meydançığında qırımtatar milliy küreş yarışları yekünlenmekte edi. Bu yarışlarda Bor-Çoqraq qasabasında yaşağan onlarca oğlan ve yigitler iştirak ettiler. Sport yarışlarınıñ teşkil eticileri Küreşniñ ğalipler ve iştirakçilerini ediyeler ve yarlıqlar ile rağbetledi.
Bor-Çoqraq sakinlerini 20 yıllıq yubileyi ile hayırlamaq içün qırımtatarlarnıñ Milliy Meclisiniñ reisi Mustafa Cemilev, onıñ birinci muavini Refat Çubarov, Aqmescitniñ Merkeziy rayon şurasınıñ reisi Sergey Tsıbulev, Meclis azaları, Aqmescit regional meclis azaları, yerli Bor-Çoqraq meclis azaları, qırımtatar içtimaiy teşkilâtlarnıñ temsilcileri keldiler.