2010 senesiniñ 15 mayıs künü Avropa Şurasınıñ Parlament Assambleyasınıñ (AŞPA) reisi Mevlüt Çavuşoğlu eki künlük iş ziyaretinen Qırımda bulunıp, Qırımtatar Milliy Meclis Reisi, Ukrainadan AŞPA azası Mustafa Cemilev, onıñ birinci muavini Refat Çubarov, QMC Yuqarı Şurasınıñ Reisi Vladimir Konstantinov ve QMC Nazirler Şurasınıñ Reisi Vasiliy Cartı ile körüşti.
Büyük musafirni selâmlaraq, körüşüvde iştirak etken Ukraina Prezidenti Memüriyetiniñ Yolbaşçısı Sergey Lövoçkin de qayd etti ki, Ukraina Prezidenti Viktor Yanukoviç ağımdaki seneniñ 13 mayıs künü Kiyevde olıp keçken Mustafa Cemilev ve Refat Çubarov ile körüşüvinde qırımtatarlarnıñ meseleleri ile bağlı toplanğan suallerini çezmege azır olğanını bildirdi. Sergey Lövoçkin qayd etkeni kibi, bu körüşüvden soñ ekinci künü peyda olğan Ukraina Prezidentiniñ Emiri bütün taraflarğa, em qırımtatar liderlerine, em merkeziy, em Qırımnıñ akimiyet organlarına yañı munasebetler qurmaq imkânını berecek.
Öz nevbetinde, AŞPA Yolbaşçısı Mevlüt Çavuşoğlu qırımtatar meselesi daa 2000 senesi 5 aprel künü № 1455 “Qırımtatarlarnıñ repatriatsiyası ve integratsiyası” adlı mahsus tevsiyeni qabul etken AŞPA’nıñ daimiy diqqatı altında olğanını qayd etip, körüşüvniñ iştirakçilerine, bütün meselelerni açıq tarzda muzakere etmege azır olğanları içün, minnetdarlığını bildirdi.
“Sizge ve Ukraina Prezidenti Viktor Yanukoviçke minnetdarlığımı bildirem. Yaqında onıñ Strasburg şeerine iş ziyareti ketişatında semereli sübet keçirdik, Viktor Yanukoviç menim iştiragim dialogqa yardım etecegini ve bağlayıcı rol oynacağı aqqında qararını bildirdi. Ondan da ğayrı, Ukraina Prezidenti tünevin imzalağan Qararınen AŞPA’daki çıqışında yapılğan ilânlarnı ömürge keçirmege başlağanına pek memnünim”, — dedi Mevlüt Çavuşoğlu.
Qırımtatar Milliy Meclis Reisi Mustafa Cemilev AŞPA Reisi Mevlüt Çavuşoğluna ve Ukraina Prezidenti Memüriyetiniñ Yolbaşçısı Sergey Lövoçkinge keçirilgen körüşüv içün minnetdarlığını bildirip, qayd etti ki, samimiy sübet keçirmege ümüt eterek, qırımtatarlar halqınıñ aq-uquqlarınıñ tiklenilmesi içün kerekli qararlar çıqarılacağına işana.
“İlân etmege ister edim ki, Qırımda biz musafir degilmiz, biz – öz toprağımızdamız! Qırımtatar halqınıñ aq-uquqları tiklenilmesinen bağlı bütün meseleleriniñ adaletli çezilmesine halqımıznıñ kelecegi bağlıdır”, — dedi Mustafa Cemilev.
Qırımnıñ Nazirler Şurasınıñ Reisi Vasiliy Cartı Qırım ükümeti içün yarımadada yaşağan bütün halqlarnıñ meseleleri aynı seviyede emiyetli olğanını qayd etip, qırımtatarlar ve bütün cemiyet tarafından yardım beklenilgen bir sıra meseleler üzerinde toqtaldı.
Soñra körüşüv iştirakçileri eñ aktual meseleleriniñ çezilüvi üzerinde toqtalıp, öz fikirlerini bildirdiler, şu cümlede, qırımtatar halqınıñ aq-uquqları tiklenilmesine yonelgen ve öz Vatanına qaytqan insanlarnıñ yerleşmesinen bağlı içtimaiy-iqtisadiy şaraitlerni teminlegen Ukraina qanunlarınıñ qabul etilmesi perspektivası baqıldı.
Qayd etmek kerek ki, ayrı suallerniñ muzakeresi ketişatında, hususan, qırımtatarlarnıñ topraq ile teminlevi, akimiyette iştirak etmeleri v ebir sıra başqa suallerge dair, körüşüv iştirakçileri qoşma añlatmalr ve diskussiyalar talap etken yanaşmalarnı bildirdiler. Amma, ayrıca qayd etmek kerek ki, körüşüvniñ bütün iştirakçileri yanaşmalarda farqlı fikirler bildirseler bile, bütün muzakere etilgen sualler ilerideki işbirlik ile çezilmek kerekliginde aynı fikirde ediler.
Aynı künü, 15 mayıs 2010 senesi, AŞPA reisi Mevlüt Çavuşoğlu AŞPA Reisi apparatınıñ yolbaşçısı Petr Sih ile Qırımtatar Milliy Meclisni ziyaret ettiler, anda olarnı Meclis Reisi Mustafa Cemilev qabul etti. AŞPA Yolbaşçısı ve Meclis Reisiniñ sübetinde Meclis Reisiniñ birinci muavini Refat Çubarov, Meclis Reisiniñ muavini Remzi İlyasov, Meclisniñ tış alâqalar bölügüniñ yolbaşçısı Ali Hamzin, Qırımtatar Milliy Qurultaynıñ delegatı Aziz Abdullayev de iştirak ettiler.
2010 senesiniñ 15 mayıs künü AŞPA Yolbaşçısı Mevlüt Çavuşoğlu ve yanında bulunğan AŞPA apparatınıñ hadimleri Qırımnı terk ettiler.
Qırımtatar Milliy Meclisniñ Matbuat hızmeti