2010 senesiniñ 18 mart künü “Köydeşler” içtimaiy teşkilâtı Qırımnıñ bir sıra içtimaiy teşkilâtlarınen beraber, Partenit qasabasında Sovet Birliginiñ Qaramanı hatırasına bağışlanğan mitingni keçirdiler. Qaramannıñ elâk oluv künü keçirilgen mitingde Partenit qasaba şurasınıñ, yerli UVC veteranlar Keñeşiniñ temsilcileri ve yerli sakinler bulundılar.
Mitingde Abdul Teyfuknıñ soy-aqrabaları da bar ediler. Olarnıñ yardımları ile cenk Qaramanınıñ torunı – Alime Temişeva tapıldı. O, 1941 senesi dünyağa kelip, Aqmescit rayonınıñ Mamut-Sultan köyünde yaşamaqta. Onıñ yardımı ile “Köydeşler” içtimaiy teşkilâtnıñ yolbaşçısı İbraim Voyennıy Qaramannıñ oğlu Abdul Yuriy Teyfukoviç ile bağlandı, o – arbiy-tıbbiy hızmetniñ polkovnigi, tıp ilimleri doktorı, şimdi Sankt-Peterburg şeerinde yaşay.
“Köydeşler” teşkilâtnıñ daveti ile Yuriy Teyfukoviç oğlu Temir ile Qırımnı ziyaret etecekler. 2010 senesiniñ 4 mayıs künü musafirler QMC Yuqarı Şurası temsilcileri ve içtimaiy teşkilâtlarnıñ iştiragı ile Aqmescit halqara ava limanında qarşılanacaqlar.
Aluşta şeeriniñ yolbaşçısı Vladimir Şçerbinanıñ qararı ile şeer şurasında musafirlerni tantanalı merasim ile qarşılacaqlar, veteran ve içtimait teşkilâtlar iştirak etecekler. Olıp keçken körüşüvde, 21 aprel künü, UVC veteranlarınıñ Aluşta Keñeşinde Partenit qasaba şurasınıñ kâtibi T.A. Makarova ğalebe parkında Sovet Birligi Qaramanı Abdul Teyfuknıñ abidesini qoymaq içün akimiyet yer ayırmağa azır olğanını bildirdi. Partenit umumtasil mektebiniñ kollektivine içtimaiy teşkilâtlarnen beraber mektepke Abdul Teyfuknıñ adını bermek ricası ile bulunmağa tevsiye etildi.
İçtimaiy teşkilâtlar – “Köydeşler”, “Çatır-Dağ”, QMC Yuqarı Şurasınıñ deputatı Remzi İlyasovnıñ iştiragı ile Sovet Birliginiñ Qaramanı Abdul Teyfuknıñ hatırasını ebediylştirilmesi boyunca tedbirler planını işletip çıqardılar, Qaramannıñ oğlu Abdul Yuriy Teyfukoviçniñ aqrabaları, Aqmescit, Aluşta ve Partenitniñ veteranları, cemiyeti, talebeler ve studentleri ile körüşüvlerni planlaştırdılar.
Arama işler neticesinde “Köydeşler” teşkilâtı Abdul Teyfuknıñ ayatı ve arbiy yenişleir aqqında tarif etken vesiqalarnı, mektüpler ve fotolarnı taptı. Qırımlı qaramanlarnıñ hatırasını ebediyleştirmek içün keçeirilgen tedbirler ketişatında “Köydeşler” teşkilâtnıñ azalarına belli oldı ki, eki yıl evelsi Alupka umumtasil mektebiniñ kollektivi şeer şurasına mektepke Sovet Birliginiñ eki defa Qaramanı Amet-Han Sultannıñ adını bermek ricası ile muracaat ettiler. Yazıq ki, Alupka şeer şurası alâ daa iç bir qarar çıqarmadı, Ğalebeniñ 65-yıllığı senesinde añlaşılmağan bir mesele.
İBRAİM VOYENNIY – “Köydeşler” Qırım cumhuriyet
içtimaiy teşkilâtnıñ reisi
SEİT-YAĞYA KAZAKOV – Afuz Şahmurat adına “Çatır-Dağ”
Aluşta qırımtatar milliy-medeniy
cemiyetniñ reisi
ANATOLİY PARHOMENKO – QMC’de arbiy areketlerniñ
iştirakçileri, arbiy hızmet ve
uquqqoruyıcı organlar veteranlarınıñ
bütünukraina areketniñ reis muavini
______________________________________________________________________________________________
Aluşta şeer şurasınıñ
yolbaşçısı
V.Y. Şçerbinağa
Sayğılı Vlaimir Yevgenyeviç!
“Köydeşler” Qırım cumhuriyet içtimaiy teşkilâtı ğalebeniñ 65 yıllığı munasebeti ile ve Sovet Birligi Qaramanı Abdul Teyfuknıñ hatırasını ebediyleştirmek maqsadınen Aluşta şeer şurasına muracaat ete:
- Aluştanıñ mekteplerinden birine Abdul Teyfuknıñ adını bermek.
- Aluşta şeeriniñ soqaqlarından birine Abdul Teyfuknıñ adını bermek (yañı qırımtatar qasabasında da ola bile).
- Şeer parklarından birinde Abdul Teyfuknıñ abidesini qoymaq ve adı ile adlandırmaq içün izin bermek.
Ürmet ile,
“Köydeşler” QCİT’nıñ reisi
İ.R. Voyennıy