2010 senesiniñ 27 mart künü Qırımtatar Milliy Meclis ofisinde Meclisniñ tış alâqalar bölüginiñ yolbaşçısı Ali Hamzinniñ Kazahstandaki qırımtatarlar disporasınıñ temsilcisi Vaspiye Aliarova ile körüşüvi olıp keçti. Körüşüv devamında qırımtatar halqı ve diasporasınıñ zemaneviy vaziyetinen bağlı meseleler muzakere etildiler.
Ali Hamzin 2009 senesiniñ mayıs ayında keçirilgen Bütündünya Qırımtatar Kongresi aqqında tafsilâtlı malümat berdi. Qayd etilgeni kibi, kongres bütün dünyadaki qırımtatar içtimaiy teşkilâtlarnıñ ğayretleri ile keçirildi.
Vaspiye Aliarova 2010 senesiniñ 12 mart künü Almatada Yabancı tiller institutında keçirlgen konferentsiya aqqında haber etti. Tedbir Türkiye elçiligi tarafından teşkil olunıp, Türkyeniñ milliy marşına bağışlandı. Konferentsiyada Almatanıñ qırımtatar teşebbüs gruppası, Uygurlarnıñ, başqır tatarlarnıñ medeniy merkezlerniñ temsilcileri, “Türkiy halqlarnıñ medeniyet fondu”nıñ Reisi Ahmet Dordugan, medeniyet ve informatsiya boyunca attaşesi Mine Kasap ve tasil boyunca mesleatçısı Kadir Çetin yolbaşçılığında Kazahstandaki Türkiye elçiliginiñ hadimleri iştirak ettiler.
Almatanıñ qırımtatar teşebbüs gruppasınıñ temsilcileri konferentsiyada Kazahstanda vatandaşlar diasporasınıñ inkişafı meselelerini açıqladılar, ilk evelâ Almata içtimaiy birleşmesi Qırımtatarlarınıñ “Vatandaş” medeniy merkezi qurulacağı aqqında aytıldı.
Ali Hamzin Kazahstandaki vatandaşlarğa 18 mayıs 1944 senesi qırımtatar halqınıñ sürügünligi aqqında şaatlıqlar toplavı “Unutma” aktsiyasında iştirak etmege tevsiye etti. Bu aktsiya Qırımtatar halqı genotsidiniñ ögrenilmesi ve aqibetleriniñ aşılması boyunca Qurultaynıñ Amhsus komissiyası keçire. O, Vaspiye Aliarovağa bu mevzudaki “Avdet” gazetasınıñ bir qaç maqalesini ve “Qasevet” dergisiniñ soñki üç sanını berdi.
Meclisniñ tış alâqalar bölügi