YUNESKO Qırımda medeniyet ve tabiat asabalığınıñ abidelerini tedqiq ete

11.05.20160:19

2011 senesi 18 mayıstan başlap, Ukrainada iş ziyareti ile YUNESKO — Tasil, ilim ve medeniyet sualleri boyunca Birleşken Milletler Teşkilâtınıñ – baş konsultantı, professor Bernd fon Droste bulunmaqta.

Daa yaqında YUNESKO yanındaki Bütündünya asabalığı merkeziniñ müdiri vazifesinde bulunğan Bernd fon Drosteniñ Ukrainağa ziyaretiniñ maqsadı – bütün insaniyet içün degerli olğan Qırımda medeniyet ve tabiat asabalığı abidelerniñ ögrenilmesidir.

Bunınen beraber professornıñ Qırımda ögrnilecek esas yerleri Han-Sarayı (Bahçisaray) ve Hersones (Aqyar).

Professor Bernd fon Drosteniñ Qırım boyunca iş ziyaretinde yanında ukrain alimleri bulunmaqta – Ukraina medeniyet ve turizm nazirliginiñ Abide qorçalavı araştırmalarnıñ İAİ’nıñ ilmiy işi boyunca müdir muavini, tarih ilimleri namzeti Timur Bobrovskiy, ilim ve tehnika, mimarcılıq ve şeer qurucılığı obyektleriniñ tedqiqatı bölüginiñ müdiri, mimarcılıq namzeti Valeriya İyevleva ve arheologik asabalığınıñ qorçalavı bölüginiñ müdiri Ruslan Osadçiy.

 

2011 senesi 4 iyun künü professor Bernd fon Droste qırımtatar saray mimarcılığınıñ saqlanıp qalğan yekâne abidesi Han-Sarayda Qırımtatar Milliy Meclis Reisiniñ birinci muavini, Bütündünya qırımtatar kongressiniñ Prezidenti Refat Çubarovnen ve tış munasebetler bölüginiñ yolbaşçısı Ali Hamzinnen körüşti. Körüşüv iştirakçileri Han-Saraynıñ zemaneviy alını ve bu unikal tarihiy abideniñ saqlanması içün kerek tedbirlerni muzakere ettiler.

Aynı künü professor Bernd fon Droste yanında bulunğan ukrain meslekdeşleri Qırımtatar Milliy Meclisniñ Reisi, Ukraina halq deputatı Mustafa Cemilevnen ve Bahçisaray rayon devlet memuriyetiniñ başı İlmi Umerovnen körüştiler. Bu körüşüvde Bahçisaray tarihiy-medeniy qoruğınıñ general müdiri Yevgeniy Petrov, Bahçisaray tarihiy-medeniy qoruğınıñ general müdiriniñ ilmiy işler boyunca muavini Oleksa Gayvoronskiy, Meclis Reisiniñ muavini Refat Çubarov ve Meclsiniñ tış munasebetler bölüginiñ yolbaşçısı Ali Hamzin de iştirak ettiler, qırımtatar haqlınıñ avdeti, yerleşüvi ve aqları tiklenüvinen bağlı bir sıra sualler ve meseleler muzakere etildi.

Körüşüvniñ soñunda Qırımtatar Milliy Meclisniñ Reisi Mustafa Cemilev musafirge Qırımnıñ medeniy ve tabiat abideleri boyunca tedqiqatlar keçirgeni içün teşekkür etip, Han-Saraynıñ YUNESKO bütündünya asabalığı cedveline kirecegine ümütini bildirdi.

Professor Bernd fon Drosteniñ Qırımğa iş ziyareti AB ve Ukraina işbirligi programması çerçivesinde Ukrainada Avropa Birligi Temsilciliginiñ qol tutuvı ile teşkil etildi.

Qırımtatar Milliy Meclisniñ matbuat hızmeti