Emiyetli vaqia

11.05.20160:19

2011 senesi 3 mart künü Qırımda emiyetli bir vaqia yüz berdi-Aqmescitte Yaltinskaya, 22 adresi boyunca Cuma- Cami qurulacaq yerde temel taşnıñ tiklenilmesi ve kapsulanıñ tantanalı qoyulması olıp keçti.

Belli olğanı kibi, 2011 senesi, 2 mart künü Aqmescit şeer şurasınıñ deputatları tarafından çoqtan beklenilgen qararlar alındı. Bu qararlarğa binaen, Qırım müsülmanlar diniy idaresine Cuma -Caminiñ qurulması içün 2,7 ga. ölçüsinde topraq damartası ayırıla.

Bundan da ğayrı, Cuma -Cami kompleksniñ territoriyasına er kes qullana bilecek rahatlıq bağçasını meydanğa ketirmek maqsadınen, QMDİ-ne kirağa bermek içün 0,39 ga ölçüsinde topraq damartasınıñ ayırmasına leyhanı işlemek ruhseti berildi.

Mezkür qararlar 2011 senesi 15 fevral künü Aqmescit şeer şurası tarafından Vasiliy Cartınıñ iştirakı ile qabul olunğan qararnıñ amelge keçirilmesi olaraq sayıla.

2011 senesi 3 mart künü tezden Cuma- Cami qurulacaq yerge sabahtan Qırımnıñ çeşit regionlarından müsülman cemiyetleriniñ temsilcileri kelip çıqtılar ve beraberlikte Allahtan berilgen bu qısmet ve nimetler içün şükür dualarını oqudılar.

Kapsulanıñ qoyulması ve temel taşnıñ tantanalı tiklenilmesi munasebeti ile keçirilgen bu müim tedbirde Qırımtatar Meclis reisi Mustafa Cemilev, QMC nazirler şurasınıñ reisi Vasiliy Cartı, Qırım müsülmanlarınıñ müftisi haci Emirali Ablayev, Ukraina prezidentniñ Qırımda daimiy temsilcisi Vladimir Yatsuba, Aqmescit şeer yolbaşçınıñ muavini Andrey Sekletsov, Aqmescit Mitropoliti ve Qırım Lazari, QMC Yuqarı Şurasınıñ ve yerli şuralarnıñ deputatları, qırımtatar milliy areketiniñ veteranları, ruhaniyler ve Qırımda diger dinler vekilleri, Aqmescit cemaatçılığınıñ vekilleri iştirak ettiler.

Bütündünya Qırımtatar küngressiniñ prezidenti Refat Çobarov musafirlerge Cuma -Cami qurulacaq yerinde kapsula qoyulması ve temel taşnıñ tiklenmesi munasebeti ile quvançımıznı paylaşmaq içün kelgenlerine minnetdarlıq bildirdi.

QMC Nazirler Şurasınıñ reisi Vasiliy Cartı alğış sözünde eñ-evelã bu kün bütün qırım sakinleri içün kerçekten de emiyetli vaqia olğanını qayd etti. ‘Qırım- çoqmilletli regiondır ve bugün biz Cuma -Caminiñ qurulışına temel taşını beraber qoyğanımız bizni çoq şey birleştirgenini isbat etmekte,’-dedi Cartı. Onıñ fikrine köre, cami qurulışınıñ başlanması yarımadanıñ milliy anane, medeniyet ve maneviy degerliklerniñ saqlanılmasında bütün qırımlılarnıñ ğayretleri birleşkenini tasdiqlay. Bundan da ğayrı, qırım akimiyetiniñ başı şunı da qayd etti ki, bugünki merasim, QMC Yuqarı Şurası tarafından Ukraina prezidenti Viktor Yanukoviçniñ Aqmescitte Cuma -Cami qurulması boyunca avalesiniñ eda etilmesidir. ‘ Bugün akimiyet halqnen beraber olıp, insanlarnıñ talaplarını yerine ketirmege tırışa. Qırım Ukrainanıñ bütün regionlarına ve diger memleketlerge iyi qomşucılıq, işbirlik, biri-birini ürmet etüv ve tolerantlıq örnegi olmalıdır’- dep, V.Cartı sözüni yekünledi.

Caminiñ qurucılıq ğayesine evelden terkibine Qırımdaki sekiz adetiy dinlerniñ vekilleri kirgen ‘Barışlıq- Rabbiniñ nimetidir’ Konfessiyalarara Keñeşiniñ azaları bildirgen ediler.

Semetdeşlerini hayırlap, qırımtatar Meclis reisi Mustafa Cemilev öz çıqışında bu vaqia bütün qırımtatar halqı içün pek emiyetli olğanını qayd etti.

Meclis reisi şunı da qayd etti ki, Qırım Müsülmanları diniy idaresi tarafından keregi dain azırlanğan vesiqalar ukrain qanuncılığına bütünley riayet etkenine ve qararnı tek qabul etmege qalğanına baqmadan, Aqmescit şeer şurası soñ qararınıñ alınmasını ep soza edi.

Mustafa Cemilev Qırım akimiyetiniñ başı Vasiliy Cartığa Cuma -Cami qurucılıq meselesine destek köstergeni içün bütün kelgenlerniñ ve Meclis adından minnetdarlığını bildirip, oña qırımtatar qalpağını bağışladı.

Kapsula qoyulmazdan ve temel taşını tiklemezden evel Refat Çubarov Qırım Müftiyatı ve Milliy Mecliske kelgen alğış telegrammalarını oqudı. Bundan soñ ukrain, qırımtatar ve rus tilinde muracaatnıñ tekstini oqup, Refat bey onı mahsus azırlanğan ve üstünde İsmail Gasprinskiyniñ ‘Tilde, fikirde, işte birlik’ ve Qırım gerbindeki — ‘İnkişaf birliktedir’ sözlerini bulundırğan kapsulağa qoyıp, onı milliy urbalarnı kiygen yigit ve qızğa berdi.

Vasiliy Cartı, Mustafa Cemilev ve haci Emirali Ablayev yaşlarnıñ elinden kapsulanı beraberlikte alıp, temel taşındaki mahsus oyuğına qoyıp, beton ile qapattılar.

____________________________________________________________________________________________

BÜYÜK CUMA CAMİ ESASINA BİRİNCİ TAŞ QOYULUVINA BAĞIŞLANĞAN TANTANALI TEDBİR İŞTİRAKÇİLERNİÑ MURACAATLARI

03 MART 2011 SENESİ AQMESCİT Ş.

Sayğılı kelecek nesilimiz!

Bugün, 2011 senesi 3 mart künü, biz, farqlı milletler ve dinler temsilcileri, Qırımnıñ ve ealisiniñ eyiligi içün birleşip, Büyük Cuma Cami esasına tantanalı sürette birinci taşnı qoydıq.

Büyük Cuma Cami bu yerde Qırım paytahtınıñ başqa dinlerniñ ibadethanelerinen beraber eñ dülber yerlerden biri olması ve insanlarnıñ yürek ve göñüllerini quvanç, sıcaqlıq ve merametliken toldurması içün bütün ğayretlerni sarf eterik.

Bu tantanalı künü biz, Qırım ealisiniñ birligini kösterip, Qırım ve Ukrainanıñ kelecegini tüşünip,eminmiz ki, siz, kelecek nesilimiz, künümizde başlanılğan hayır işlerini qat-qat arttırsıñız ve Qırımnı güllegen ülkege çevirirsiñiz, bu yerdeki tiller, ananeler ve medeniyetler çeşitligi er kesniñ baylığı olur.

Qırım Muhtar Cumhuriyetiniñ

Nazirler şurasınıñ Reisi Vasiliy Cartı

Qırımtatar Milliy Meclisniñ

Reisi Mustafa Cemilev

 

Qırım müsülmanları müftisi haci Emirali Ablayev

________________________________________________________________________________________

Qırımtatar Milliy Meclisniñ Reisi

Mustafa Cemilevge

Assalâmu aleykum ua rahmatullah

Sayğılı Mustafa Cemilev!

“Alraid” İçtimaiy teşkilâtlarnıñ bütünukraina assotsiatsiyasınıñ ve İslam içtimaiy medeniy merkezlerniñ azaları ve hadimleri adından, em de şahsen özüm can-yürekten Sizni ve Qırımnıñ episi müsülmanlarnı Qırımda İslamnıñ tiklenüvi devrindeki müim vaqianen – Cuma Cami qurucılığı yerinde birinci taş qoyulasınen hayırlayım!

Qırımda islam ve müsülmanlarnıñ hayırı içün yapılğan bu büyük işte Allah yardımcı olsun.

Ürmet ile

“Alraid” Assotsiatsiyasınıñ Reisi doctor İsmail Kadı

“02” “mart” 2011 senesi

_________________________________________________________________________________________

Qırım müsülmanları müftisi haci Emirali Ablayevge,

Cuma Cami qurucılığı yerinde hatıra taşınıñ qoyulmasına

bağışlanğan tedbirniñ iştirakçilerine

Sayğılı Qırım Müftisi haci Emirali Ablayev! Sayğılı Qırım ealisi!

Cuma Cami qurulacaq yerinde hatıra taşı qoyulmasına bağışlanğan tantanalı tedbirde hastalıq sebebinden iştirak etip olamayım.

Bu yerde Cuma Cami qurucılığı aqqında birinci qararlarnıñ qabul etilmesinde işitrak etken insan ve devet memurı olaraq, Qırımnıñ episi sakinlerine, milleti ve dinine baqmadan, merametlik ve hayırişler, tınçlıq ve birlik tilemege isteyim!

Qırım Muhtar Cumhuriyeti Nazirler şurasınıñ reisi Vasiliy Georgiyeviç Cartınıñ rolüni ayrıca qayd etmege ister edim, Ukraina vatandaşlarınıñ aqlarına dair onıñ printsipial pozitsiyası Cuma Cami qurucılığınıñ yeri etrafıda evelden toplanılğan meseleler çezilüvinde yardımcı oldı.

Eminim ki, bugünki tantanalı tedbir ile biz, epimiz birlikte, Qırım ve umumen Ukrainanıñ episi halqlarınıñ birleşmesi yolunda müim bir adım yaptıq!

Ürmet ile,

Ukraina halq deputatı,

Urainanıñ Regionalr partiyası fraktsiyasınıñ azası Boris Deyç

2011 senesi 03 mart