28 yanvar künü “Komsomolskaya pravda” gazetası Qırım ofisiniñ matbuat merkezinde “Qırımda topraq meselesi nasıl çezile?” mevzuda internet sübet keçirildi, Qırım sakinleriniñ suallerine onlayn rejiminde Qırımtatar Milliy Meclis reisiniñ birinci muavini, QMC YŞ’da “Qurultay-Ruh” fraktsiyasınıñ yolbaşçısı Refat Çubarov cevap berdi.
Qırım sakinleri sübetni onlayn rejiminde nezaret eterek, Refat Çubrov ve Vasiliy Cartı ne aqqında laf etkenlerinen, ne qadar qırımtatar topraq alınmasına muctac olğanınen, Ukraina Prezidenti yanındaki Qırımtatarlar temsilcilerniñ keñeşiniñ evelki terkibi toplanılacağınen meraqlana ediler.
“Zair Smedlâyevke qarşı açılan mahkeme işi – siyasiy sımarış ya da aqiqat?” sualine cevap bererek, Çubarov qayd etti ki, soñki 2-3 yıl içinde Qırımda militsiya işitragi ile çoq davalar olğan edi. İç birisine baqmadan, mahkeme işleri açılmağan edi. “Hatırlatayıq, bir qaç yıl evelsi Puşkina soqağında Ofitserler evinde Ukraina ve NATO’nıñ işbirligine bağışlanğan tedbir keçirildi, anda V.Zaharov ve başqa deputatlar büyük dava çıqardılar, militsionerlerniñ urbalarını yırttılar. Amma, ne içündir, iç bir mahkeme işi açılmadı. Bu sebepten de, aytmaq mümkün ki, Zair Smedlâyev mahsus seçilip mhkeme işine oğratıldı”, — dedi Refat bey.
“Refat bey, tasavvur etiñiz ki, siz, QMC NŞ yolbaşçısı olaraq, Cartınıñ yerindesiñiz, halqıñıznıñ meseleleri çezilüvinde neden başlar ediñiz?” sualine deputat qayd etti ki, er insan alğan vazifesine köre, bir sıra meselelerni çezmeli. Bu mesele konkret bir insannen ya da bütün halqnen bağlı olsa, öz aktsentlerni qoymaq, öz niyetlerini, ayat degerliklerini belgilemek kerek, insanlarda işanç doğurmaq içün. Bunıñ esasında da sualler çezilecekler. “66 yıl evelsi ne olıp keçkenini añlayım, ve Qırımnıñ tamır halqlarından biri özgünligini ğayıp etmek havflığında olğanını körem. Bunıñ episi — sürgünlikte keçirilgen yıllarnıñ aqibetleridir. Ve men, insan olaraq, añlayım ki, er angi halqnıñ yoq olması – bütün dünyanıñ faciasıdır, dünyanıñ daa bir hususiyetniñ ğayıp olmasıdır. Onıñ içün men, bu vazifede bulunıp, bu insanlarnıñ, ilk evelâ, yarın ve ileride Qırımda başqa halqlarnen beraber inkişaf eteceklerinde eminlikleri içün çalışacam”, — dedi Çubarov.
Elmara MUSTAFAYEVA