4 iyül künü Hoca Ahmet Yasaviyniñ adına Halqara Kazah-Türk üniversitetiniñ delegatsıyası, şu cümleden, halqara munasebetler bölüginiñ reisi Saunrabek Jamalbekov ve azırlıq bölüginiñ dekanı, filologiya ilimler namzeti Nursalet Aytbayeva qırımtatar Meclisini ziyaret ettiler.
Saunrabek Jamalbekov ziyaretniñ maqsadını añlatıp, HKTÜ rektorı L.T.Taşımovnıñ tasil saasında işbirlik, milliy kadrlarnı azırlamaq ve munasip añlaşmanı imzalamaq teklifini bildirdi.
2003 senesinden başlap, HKTÜ türktilli halqlarğa üniversitetlerinde oqumaq içün yerlerni ayıra, 150 dolar miqdarında stipendiyanı töley, yataqhane ile temin ete, yılda bir kere evge barıp kelmek yol parasını teminley ve studentlerniñ içtimaiy ve tıbbiy imayesinde yardım köstermekte.
2011 s. HKTÜ qırımtatar ve gagauz halqları içün stipendiya tölemek, milliy kadrlarnı azırlanmasında yardım köstermek maqsadı ile 5-er yer ayırmaq qararını aldı.
Mustafa Cemilev fenler aqqında, ilim saasında iş, üniversitetniñ diger cumhuriyetler ile munasebetleri aqqında onı meraqlandırğan suallerni berip, tasil saasında yardım köstergenleri içün minnetdarlıq bildirdi. Meclis reisiniñ yanında qırımtatar yaşları arasından mutehassıslarnı azırlanmasında işbirlik añlaşması imzalandı.
Malümat: 2001 senesi 26 sentãbr künü Kazhstan Cumhuriyetiniñ akimiyeti ve Ukraina nazirler kabineti arasında tasil, ilmiy unvanlar aqqında vesiqalarnıñ eki taraflama qabul olunması boyunca añlaşma imzalanğan edi.
Kazahstan Cumhuriyeti Prezidentiniñ 1991 s. 3 iyün 329 tarihlı fermanı ile Turkestan devlet üniversiteti meydanğa ketirilgen edi. Oña türk dünyasınıñ ulu felsefecisi ve alimi Hoca Ahmet Yasaviyniñ adını berdiler. 1992 senesi 31 oktãbr künü Türkiye ve Kazahstan Cumhuriyetleri arasında akimiyetlerara añlaşma esasında Hoca Ahmet Yasaviy adına Halqara Kazah-Türk Üniversiteti açıldı. Mezkür üniversitet tek Kazahstanda degil de, bütün Asiyada ilk halqara üniversitet sayılır.
Üniversitette çeşit türk memleket ve cemaatlarnıñ vekilleri oquy. Al-azırda üniversitette 14.5 biñ talebe oquy. Türk tilli studentlerniñ sayısı ise 1000 dir.
HKTÜniñ ocaları bayağı yüksek unvanlarğa saipler: mezkür oquv yurtta Kazahstan Cumhuriyetiniñ milliy İlimler Akademiyasınıñ 6 akademigi, 116 professor, ilimler doktorları, 618 dotsent, ilimler namzetleri ocalıq yapmaqtalar. Üniversitette 61 zenaat boyunca mutehassıslar azırlanıla. Üniversitette gumanitar, pedagogik, iqtisadiy fenlerden ğayrı, sağlıqqoruv, içtimaiyat,ekologiya, arheologiya, halqara munasebetler, devlet idareciligi, etnologiya, turizm, aktörlıq, vokal sanatı, süsleme sanatı, horeografiya, ananeviy etnomuzıka sanatı ve digerleri ögretile.
Üniversitette 4 institut mevcut:
Türkşınaslıq boyunca ilmiy-araştırma institutı,
Ekologiya ilmiy-araştırma institutı,
Arheologiya ve etnologiya ilmiy-araştırma institutı,
Tıbbiyet institutı.
Tasilini çetelde devam etmege istegen üniversitet mezunlarına tevsiyenameler berile.
Qırımtatar Meclisiniñ matbuat hızmeti.