Ağımdaki seneniñ fevralniñ ortasında Qırımtatar akademik muzıkalı-drama teatriniñ sanasında millit teatrniñ tarihında ilk defa “Arzı qız” adlı balet süitası kösterilecektir. Bu aqqında QHA agentligine teatrniñ bediy reberi, Ukrainada nam qazanğan sanat erbabı Bilâl Bilâlov haber etti.
Onıñ bergen haberine köre, yañı sanalaştırmanıñ rejissöri ve horeografı Qırım akademik muzıkalı-dramatik teatriniñ baş baletmeysteri, Ukrainada nam qazanğan artist Munir Ablayevdir.
“Balet üzerindeki iş dört ay alıp barıldı, premyerası ise keçken seneniñ noyabr ayına planlaştırılğan edi, amma para teminlevi yeterli olmağanından o, daa keç vaqıtqa keçirildi”, — tarif etti Bilâlov.
Malümat. 1989 senesi artistlerniñ (İ.Bahşiş, A.Dittanova, M.İbraimova, A.Cemilev, S.Umerov, S.Osmanov) teşebbüsi ile Qırımda qırımtatar teatri ğayrıdan tiklenildi. 1990 senesi 15 aprelde tiklenilgen teatr Y.Bolatnıñ pyesası boyunca “Arzı qız” adlı birinci spektakl köstere. Bu yıllar devamında teatrde 35-ten ziyade spektakl ve kontsert programma kösterildi.