Ağımdaki seneniñ sentãbrde 1 -11 sınıflar içün gumanitar fenleri boyunca umumtasil mekteplerinde etnik ve diniy gruppalarğa korrektsiz munasebetini tapmaq maqsadı ile derslikleriniñ keniş araştırması başlanıldı. Leyhanıñ adı- ‘Tolerant derslikler- tolerant cemiyet’.
Mektep dersliklerniñ monitoringi Bağçasaray şeeriniñ ocalar keñeşi ile «Вiдродження» (‘Tiklenüv’) Halqara fondnıñ destegi ile teşkil etilgen. Teşkilãtınıñ rehberi- Dilãra Seytveliyeva. Leyhanıñ işine professional tarihçılar ve pedagoglar celp etildi. Leyhanıñ işinde iştirak etmek içün qırımtatar medeniyeti ve tarihı boyunca bir sıra eserlerniñ muellifi, QMPÜ qırımtatar tili ve edebiyatı boyunca ilmiy araştırma merkeziniñ hadimi Elvedin Çubarov davet etildi.
29 sentãbr künü Qırım tarihçılar Assotsıatsıyasınıñ toplaşuvında QMPÜ Tarih kafedrasınıñ ocası Gulnara Bekirova mezkür leyhanıñ sebeplerini açıqladı: ‘Ukraina- çoqmilletli ve polikonfessional devlettir. Onıñ mında barış ile yaşamaq- Ukrainanıñ inkişafını belgilegen ihtiyacdır. Böyle etip devlet vatandaşlarınıñ yaşlıqtan, mektepten başlap tolerantlıqqa ögretilmesi ayrıca emiyetli ola. Mektep derslikleri- bilginiñ esas menbası olmaqtan ğayrı, şahsiyetiniñ dünyabaqış qurucılarıdır. Mektep derslikleriniñ mündericesinden devlet vatandaşlarınıñ degerlikleri, demek onıñ kelecegi ve inkişafı bağlıdır. Bu sebepten, mektep dersliklerinde zemane Ukrainada yaşağan halqalarğa nisbeten mümkün olğanı qadar korrekt, doğru malümatlar bulunğanı ğayet mühimdir’.
Leyha neticelerini cemiyetke tanıtılması közde tutula.