Hayırlı yaşlar olsun, Aqmeçet qasabası!

11.05.20160:19

Bundan tamam yigirmi yıl evelsi Aqmescit şeer şurası Vatanğa qaytıp kelgen qırımtatarlarğa Novonikolayevka mikrorayonındaki lavanda ösken tarlada mesken evler qurmaq içün topraq ayıruv boyunca qarar qabul etken edi. Ebet, bu qarar qolaylıqnen elde etilmedi, ondan evel Moskvada, Qırımda bir sıra narazlıq mitingleri ötkerilgen, talaplar artından talaplar ögge sürülgen edi. 1989 senesiniñ yazında Molodöjnoye qasabasında öz başına qurulğan muvaqqat evçikler yıqtırılğan soñ İzzet Reşetov, Amet Haybulayev ve digerlerinden ibaret teşebbüsçi gruppa meydanğa ketirilip, Aqmescitniñ civarındaki lavandadan ğayrı iç bir şey ösmegen bu qayalı yerde qırımtatarlarına beş yuz uçastka berilmesine irişildi. Akimler bizni bu yerden qaçıp, taşlap keterler bellep, pek yañıldılar.

Bugünde-bugün bir zamanalr boş turğan bu alanlıqta qırımtatarlar asırlarnen turacaq dülber, qaviy evler qurıp, ışığı, yolları, suvu, tabiy gazı, telefon ve interneti – umumen insannıñ raat-raat yaşaması içün bütün zarur şaraitleri olğan Aqmeçit qasabasını meydanğa ketirdiler. Bütün bular insanlarımıznıñ birligi, işkirligi ve vatanperverleri sayesinde irişildi. Devlet tarafından ise iç bir türlü yardım olmadı. Şunıñ içün de mında yerleşüvimizniñ ilki yıllarında daa yaş insanlar hastalanıp öldiler. Vagon içinde yaşağan qorantanıñ gaz ballonı patlağanı aqibetinde bir kereden üç balası ateş içinde yanıp, anaalrı ise aqıldan azğanı iç unutılırmı?

Qasaba sakinleri yavaş-yavaş ayaqqa turıp başladılar. 1992 senesi yerli meclisni saylap, reisi olaraq Ruslan İlyasov, yardımcıları etip ise Amet ağa Haybullayev ve Lütfiye Kâzimova seçilgen ediler. Artıq qasaba sakinleri içün oñaytlı şaraitlerniñ yaratılmasını talap etüv meclis azalarına avale etildi. Nevbetteki er bir oñaytlıq peşinden aylarnen çapqalamaq, idare ve müessiselerniñ qapılarını açmaq kerek oldı.

 

Mesken quruvnen aynı zamanda qasaba sakinleri ömürniñ maneviy taraflarını da unutmadılar. Er sene qasabada tantanalı sürette Oraza bayramı ve Qurban bayramı qayd etildi. Qasabada cami içün yer belgilemek de bayağı küç ve vaqıtnı talap etti. Remzi Ablekerimov, Reşat Osmanov, Cafer Ğafarov, eskender Vagapov, Eskender Fazılov, Server Ametov, Remzi Alimov, Zülfiye İzedinova, Ayşe Karayeva, Rustem Halilov, Elvina Ablimiçitova, Ruslan Osmanov, Server Mecitov, Lütsiya Yakubova ve digerleri yardımı ile qurulğan camimizniñ binası qasabamıznıñ eñ dülber yaraşığıdır.

Ekki ve atta üç qatlı zemaneviy evlerden ibaret qasabamızğa baqıp, daa nasıldır yigirmi yıl evelsi mında boş tarla olğanını tasavur etmek küç. Keçken vaqıt zarfında mında çoqtan-çoq yañı aileler quruldı, yañı oğlan ve qızçıqlar dünyağa keldiler. İşte, qasabamıznıñ kelecegi olarnıñ elinde, çünki mında daa yapılacaq işler pek çoq.

Hayırlı yaşlar olsun, Aqmeçet qasabası!