Er yıl mevsimi teşkilâtımız qırımtatar yaşları içün medeniy-ögretici lagerler keçire: küz lageri Nikolayevka qasabasında, qış lageri Aq-Meçet rayonınıñ Qaraca köyünde, baar lageri Bahçisarayda.
Nevbetteki lager yaz lageri oldı. Bu sefer biz musafirhanede degil de, tabiatq ayaqın olıp, öz tedbirimizni ormanda keçirdik. Ve Baydar vadisinden uyğun yer tapalmadıq. Baydar vadisinde em dağlar, em orman, em özen-göller, çeşmeler bar. Onıñ içün biz keçirüv yerini tez seçtik.
22-24 iyül künleri “Yaşlar şurası” teşkilâtı daa bir leyhasını ömürge keçirdi – Yaz lageri-2011. Tedbir ketişatını tarif etmekten evel, bu tedbirniñ maqsadları aqqında aytmaq kerek.
“Yaşlar şurası” teşkilâtınıñ maqsadı – qırımtatar medeniyeti, adetlerine, til tiklenüvine yardım etmek, ve, ebet, İslamnı ögrenmek. Bu maqsadlarğa irişmek içün, biz endi populâr olmağan ve özüne diqqat celp etmegen tögerek masalar, seminarlar, universitetlerde lektsiyalardan çetleşmek qararıne keldik. Biz icadiy yanaşıp, ana tili, din, medeniyet ve tarih ögrenilesi içün interaktiv usullar qullanmağa istedik. Ve körgenimiz kibi, yañlışmadıq, atta bu yonelişte belli bir neticelerge irişe bildik.
Bizim medeniy-eglenceli lagerimizniñ maqsadı – yaşlarnı tanıştırmq ve halqımınıñ meseleleri etrafında birleştirmek, meselelerni ise iştirakçilerniñ özleri belgileyler. Meraqlısı şunda ki, yaşlarnı raatsızlağan esas meseleleri — ev ya da topraq meselesi degil de, halqnıñ birligi, tili, dini coyula yatqanıdır.
Kösterilgen meselelerniñ çezilüvi usullarından esası – özünden başlamaq. Onıñ içün biz lager çerçivesinde çeşit diskussiyalar keçiremiz, musafirlerni davet etemiz, beraber ögrenip, halqımıznıñ meseleleri çezilüviniñ yollarını işletip çıqaramız.
Medeniy-eglenceli lagerniñ çeçivesinde biz tarihnı qırımtatar halqınıñ şekillenüvinden başlap, künümizge qadar ögrenemiz, doğğanından ölgenine qadar insan ömrünen bağlı halqımıznıñ adetlerini ögrenemiz. Er bir lagerde din mevzusında sübetler keçirile.
Böyleliknen, 22-24 iyül künleri Qırımnıñ manzaralı köşelerinden biri – Baydarda, gölniñ yalısında çadırlarımıznı qurıp, anda üç kün yaşadıq. Çadırlar bir kün evelsi “Yaşlar şurası” teşkilâtınıñ azaları Dilâver, Asan, Murat tarafından quruldılar. Olar bu yerge aqşam 21 iyül künü keldiler. Qayd etmek kerek ki, gece bizni yağmur yaqalap, bizde silinmez teesuratlar qaldırdı – gece dağlardamız, etrafta er şey gürüldey, yaşın, yağmurdan saqlanmağa yer yoq.
Aqşam, 22 iyül künü, lagerniñ iştirakçileri belgilengen yerge keldiler. Çadırlarda yerleşken soñ, oyun tarzında episi iştirakçiler tanış oldılar ve lezzeti aş pişirmege başladılar. Aşçı sağolsun, defalarca bizni öz ustalığınen şaşırttı. Soñra bir qaç interaktiv oyunlar, milliy yırlar, gitarada oyunlar, ateş yanında laflar ve yuqu.
Nevbetteki kününiñ sabasına er kes saba sport meşğuliyetlerini yapmağa aşıqtı. Aş aşağan soñ, vadige ekskursiyağa kettik. Qaytqanda, bizni endi trener ve lektorlar bekley ediler, bizge “Qurultay, Qırımtatar Milliy Meclisi” mevzusında sıcaq diskussiyalar doğurğan trening keçirdiler. Cumaertesi künü aqşam bizge Bahçisaraynıñ diger imamlarınen beraber Han Caminiñ imamı Sabri-oca keldi, “Muqddes Ramazan ayı” mevzusında subet keçirdiler. Qayd etmelimiz ki, bu diskussiyadan soñ, bazı yaşlar oraza tutmaq qararına keldiler, evelde ise niyetleri bile yoq edi. Soñra lezzetli aqşam yemegi, vadide kezinti ve çoqusını fikir etmege celp etken filmniñ beraberlikte seyir etilmesi. Yuqu.
Saba kene de sport meşğuliyetleri, acayıp saba yemegi, diñleyicilerniñ teşekkürini qazanğan “Vaqıt idaresi” treningi. Soñra üyle yemegi, ve lagerniñ soñu yaqınlaştı. Yazıqsınuv ile şeylerimizni toplamağa başaldıq. Qaytmaq içün yolğa çıqtıq.
Er bir tedbirde yetişmemezliklerni tapmaq mümkün. Lagerimizniñ yetişmemezligi – tek yuqu yetişmegenidir, em teşkilâtçılar, em iştirakçiler yuquğa toymadılar, çünki yaşlar yuquğa vaqıt masraf etmeyip, daa çoq bir-birinen qonuşmağa istey ediler.
“Yaşlar şurası” cemaat teşkilâtı
Y.A.