Estrada
rejissörı, fotoressam
Men rejissörlıqqa
oqumağa kirgende, menim aydın bir arzum bar edi ve onı amelge keçirmek içün
mıtlaq bu kafedrada bilgi almaq kerekligini bile edim. Bu Kiyevde olacağına
aslı şübhelenmey edim. Keyfiyetli bilgi, tecribe ve tanışuv dairesine tek anda
saip çıqacağımnı añlay edim. Ve iç te peşman degilim, atta aksine qorqmayıp
paytahtqa barğanıma ğururlanam.
Rejissörlıq-
küçük mehanizm ve unsurlardan ibaret olğan balaban bir maşınadır. Bular episi
yahşı çalışması içün er vaqıt işlerini teşkirmek kerek. Küçük bir şeyni közden
qaçırsañ bunı mıtlaq körerler. Onıñ içün men komandada çalışmağa sevem. Fikirdeşlerimni tapıp böyle
bir komandanı teşkil etsem, söz berem- emegimizniñ neticesini birden körersiz.
İnsanlarnen çalışmağa
başlap ta, olar saña ayaq çalsalar, hoş kelmey ebet. Neticede em özüm içün em
de olarıñ içün er şeyni yapmağa mecbur olasıñ.
Tedbirde Prezident,
baş-nazir ya da diger yüksek rutbeli insanlar olsa çalışmağa pek ağır ola.
Olarnıñ qorucıları çoq ola, işke keder etile.
Hayal etkenim leyha- Kiyevde
‘Yevrovideniye-2005 ‘. Bu Ruslana ve yarış iştirakçilerniñ büyük acayip
kontserti edi. Men rejissör yardımcısı ve güzel komandanıñ qısmı edim.
Estradamıznıñ
esas probleması şu ki, oña kimse maddiy destek
bermege istemey. Amma bu er angi bir biznes kibi. Onı başlamaq içün ve
soñra neticelerine de irişmek içün başlanğıç sermiya zarur.
Bizim halqımız
pek istidatlı. Sanat ve icatnıñ er bir çeşitinde qırımtatarlar dünya seviyesine
çıqıp olur ediler. Amma buña kene de sermiya kerek. Başqaca olmaz.
Şunı hatırlamaq kerek
ki, er bir işni mutehassıs yapmalı. Oyunnı horeograf qoya, kostümlerni-
stilist, levha ya da kontsertni ise
rejissör qoymalı. Böyle alda bütün komandanıñ keyfiyeti ve professonallığı
körünir.
Mında Qırımda pek
çoq şey yapmağa ister edim. Halqımıznıñ medeniy mirası ile ve zemaneviy
estradanen bağlı ğayeler bar. Kontsert, icadiy aqşamlar, yubiley, atta bazı
artistler içün klip ğayeleri peyda olmaqta. Maña çalışmağa ve icad etmege tek
imkãn bersinler! Şimdilik ise men çetten nezaret etem ve alışam.
Menim şekillenüv
devrimde, yani bu hayatımda öz maqsat ve isteklerimni belgilegen vaqıtta maña
Aqmescitteki ‘Na moskoltse’ teatr-studiyası pek yardım etti. Bu vaqıttan
başlap, men professional cehetten ösmege başladım, şiiriyet, teatr, icatqa
sevgim peyda oldı.
Fotolarnı 15
yaşından başlap sevdim. Bir seyahat vaqtında dostum taş üstünde oturğanını
kördim. O ufuqqa doğru, dağlar töpesine baqa edi. Baqışı hayalperest, saçları
yelde dalğalana ediler. Ögde kiyik şaqayıqlar aça ediler, dostumnıñ koftası da
çiçeklerge kelişken tüste edi. Dostum öz tüşüncelerine dalıp otura edi. Menim
közlerimniñ ögümde ise romantika,
serbestlik ruhu ve sevginen tolu bir levha peyda oldı. Men onı fotoğa çıqardım. Şu fotonı alã daa
saqlayım. O menim içün bu dünyanı başqa közlernen köre bilgenim devirniñ
başlanuvı kibi degerlidir.
Fotoda fikir olmalı. Fotoda mıtlaqqa bir şey
diqqatnı celp etmeli: insannıñ baqışı, meraqlı bir levha, süretniñ keyfiyeti.
Muhteşem bir şey yapmaq içün sadece göñül ve yürekniñ peşinden ketmeli. Şedevr
eserlerini yaratmağa qısmetiñiz olsa, siz olarnı mıtlaq yaratırsız.
Bazıda soqaqta
kezgende meraqlı levhalarnı tapam, ya da mında şimdi bu ya da diger levhağa daa bir qaraman qarışır
dep aldını alam ve bekleyim.
Bir kün men Ayuv
dağnıñ cabında tırtırnı fotoğa çıqara edim. Uçurumğa arqanen otura edim. Daa
güzel çıqarmaq içün biraz artqa çekilip, az qaldı yıqılacaq edim. Amma meni bir
çalınıñ tamırları qurtardı, men onı tutıp yetiştirdim.
Yorğannen sarılıp,
elime balaban bir filcan sıcaq çay alıp, oqumağa sevem, dostlarımnen
seyahtalarğa barmağa sevem, Kiyevde aqşam üstü kezmege sevem, canlı muzıkanı
diñlemege, Fotoğa çıqarmaq, yañı bir şey bilmek; balalarnı sevem, yeşil renkni
sevem.. Nikolay Gumilövni oqumaq, Nikolay Noskovnı diñlemek, Nikolay Rerihnıñ
resimlerini seyir etmege sevem.
Islengen qaraerik
sevmeyim, Grigoriy Lepsnı begenmeyim. Em de qızğanıç, hiyanet, tartışmalı,
bencil insanlarnı sevmeyim
Yarımadamızda menim içün pek qıymetli yer bar- Ayuv- dağ
eteginde deñiz yalısı.
Qadınnı misalsiz
ve hususiy onı sevgen erkek yapa.
Erkek aslı qadın
kosmetikağa ve dülberlik salonlarına ne qadar masraf etkenlerini bilmemek
kerek. Erkek qadın özüni nasıl dülberleştirgenini körmemeli.
Oğlum doğğan
soñ öz hayatıma daa mesuliyetli
yanaşmağa başladım, çünki onıñ içün mesüliyetli oldım. Misal
olaraq, men yolnı muqaytlıqnen keçem, zembilden atlıp tüşmege de artıq hayal
etmeyim. Men yaşamalım, çünki benim oğlum bar! Bundan da ğayrı, zorbalıq, hususan balalarnen fizik cebir kösterilgen yayınlarnı baqmayım.
Yolumda hayatımnı
deñiştirgen insanlar rastkele. Bu
cehetten men bayağı qısmetlim.
Dosye: Dinara
Ahtemova.
1982 senesi,
Taşkentte doğdı. Ana-babasınen 1989 senesi Abhaziyadan Qırımğa qayttılar.
V.G.Korolenko
adına Poltava devlet pedagogika üniversitetiniñ ‘başlanğıç sınıflarnıñ ocası ve
ameliy psiholog’ fakültetini; Kiyev medeniyet ve sanat Milliy Üniversitetiniñ
‘estrada ve kütleviy bayramlar rejissörı’ fakültetini bitirdi. Rejissör
yardımcısı olaraq, çeşit kontsert meydanlarında çalıştı: ‘Altın qalem’ jurnalistler saasında er yıl
mukãfat tseremoniyası, Poplavskiyniñ solo kontsertleri, ‘Krok do zirok’ bala televizion konkursı, ‘Altın
şarmanka’ estrada icracılarnıñ mukãfatlandıruv
tseremoniyası, ‘Yevrovideniye’, ‘Nesil-2010’ mukãfatlandıruv tseremoniyası ve il. Al-azırda Dinara Qırım mühendislik
pedagogika üniveristeti ile leyha azırlamaqta.
Ay-melevŞe azırladı