Faal dialog formatı:

11.05.20160:19

Herson vilâyetinde yaşağan qırımtatarlarnen körüşüvler

2011 senesi 3 aprel künü Qırımtatar Milliy Meclisniñ reisi, Ukraina halq deputatı Mustafa Cemilev, Qırım müsülmanları müftisi haci Emirali ablayev ve Bütündünya qırımtatar kongressiniñ Prezidenti Refat Çubarov Herson vilâyetinde (Sçastlivtsevo, Partizanı, Novoalekseyevskiy qasabalarında) yaşağan vatandaşlarımıznen körüşüvler sırasını keçirdiler. M.Cemilevniñ, haci E.Ablayevniñ ve R.Çubarovnıñ çıqışlarından soñ, körüşüv dialog formatına keçti, iştirakçiler muzakere etilgen sualler boyunca öz fikirlerini, suallerini ber ebile ediler. Körüşüv iştirakçileri qırımtatar halqınıñ siyasiy ve ruhiy birliginen bağlı suallernen meraqlana ediler. Vatanğa qaytmaq içün, Qırımda topraq berilmesi sualleri de köterile ediler. Ondan da ğayrı, Qırım sıñırlarından tış yaşağan vatandaşlarımıznı ana tiliniñ saqlanılması, balalarınıñ Qırım aliy oquv yurtlarında oqumaları, Qırımda iş meselesi raatsızlay edi. Toplaşuv iştirakçileri özüne “Ukraina müftisi” degen Ahmed Tamimniñ emissarlarınıñ bölüv faaliyetinen raatsızlanğanlarını bildirdiler. Novoalekseyevskiy qasabasında yaşağan (4 biñge yaqın qırımtatar) vatandaşlarnıñ, yerli meclisniñ faalligi ile ve Qırım müsülmanları diniy idaresiniñ yardımınen Novoalekseyevkada yañı cami quruldı, yerli mektepte balalarğa qırımtatar tili ögretile. Körüşüvlerniñ neticeisnde qayd etmek kerek ki, vatandaşlarımızğa 2010 senesi 31 oktâbrde olıp keçken yerli saylavlardan soñ Qırımnıñ içtimaiy-siyasiy vaziyeti, qırımtatarlarnıñ vaziyeti aqqında malümat berildi.

Öz çıqışında Mustafa Cemilev qayd etti ki, qırımtatar halqı etnos olaarq saqlanmağa, öz aqlarını tiklemege istese, birinciden, birlik olmaq kerek, şu cümlede ülkeniñ siyasiy ayatında.

Meclis yolbaşçısı vatandaşlarnen yahşı haberlernen de paylaştı – Büyük Cuma Cami qurucılığına, niayet, topraq berildi. Cami qurucılığına çetel ve ukrain sponsorları yardım etecekler.

 

Öz nevbetinde, Refat Çubarov, birinciden, herson regionında yaşağan er bir vatandaşqa keçken asırnıñ 60-70 seneleri cesürlik köstergenleri içün minnetdarlıq bildirdi.

Qırım sıñırlarından tış yaşağan qırımtatarlarğa muracaat eterek, haci Emirali Ablayev qayd etti ki, din vastası ile müsülmanlarnı bölmege istegenler büyük zarar ketireler. Bugün Qırımda Qırım müsülmanlarınıñ diniy idaresi resmiy faaliyet köstere. Bu İdare üç yüzden ziyade müsülman cemiyetleriniñ vekilleri tarafından konferentsiyada seçile, ve yarımadanıñ bütün müsülman ealisi tarafından tanıla. İdareniñ başında Qırım müsülmanları müftisi ve onıñ muavinleri tura. Herson vilâyetinde peyda olğan diniy aqıntılar aqqında suallerge cevap bererek, müfti qayd etti ki, bunıñ episi “Ukraina müsülmanları diniy idaresi” olaraq özüni adlandırğan, müsülmanlarnı bölmege istegen din teşkilâtınıñ ıntıluvlarınıñ neticeleri.

Vatandaşlar Meclis yolbaşçılığına böyle körüşüvlerni sıqça keçirmek ricası ile muracaat ettiler.

Öz tarafından, Meclis yolbaşçılığı ve Qırım müsülmanları müftisi haci Emirali Ablayev Herson regional meclisine körüşüvlerniñ yahşı teşkil etilmesi içün, vatandaşlarğa faal ayat pozitsiyaları içün minnetdarlıq bildirdiler.