Küçlü nesil:Marlen Kurbedinov

11.05.20160:19

Küçlü nesil: ne istegenimizni bilemiz

Küçlü nesil – ne istegenini bilgen, bilgenini yapqan, ve daa bilmegenini ögrengen yaşlardır

Yüksekçe, tezce, küçlüce. Küçlüce

Bala bağçasında balalardan soradılar: aqiqqiy erkek nasıl olmalı. Aman-aman er cevapta “küçlü” hususiyeti keçe edi, özüni, ailesini qorçala bilmek kerek. Belki, bu, bala qafasındaki stereotiptir, amma o qadar yaramay degil. Aqiqaten, çoqusı erkekler böyle idealğa ıntılalar, hususan “sıcaq qanlı” erkekler, olar arasına qırımtatarlarnı da kirsetmek mümkün.

Küçlü olmaq içün, ruh küçü ve beden sağlığı olmaq kerek. Birleri öz sağlığına alkogol ve tütün ile zarar ketirip, başqaları küreşçi ustalığını, sport karyerası içün degil, sağlıqlı olmaq içün ögreneler, dey bugünki qaramanımız Marlen Kurbedinov.

Belki, defalarca eşitken ediñiz ki, sportçılarnen qonuşmaq ağır, olar öz fikirlerini zornen añlatalar. Bugün biz 2009 senesi oriyental sport (World Oriental Federation WOF) boyunca ve 2009 senesi kikboksing boyunca Qırım çempionı ve 2010 senesi M1 selection krimea mutehassıs reyting küreşlerniñ ğalibi ve aynı vaqıtta bilgisayar ekimi ile qonuşamız.

Sportçılarnı aqılsız dep sayğanlar, aqılsızlar. İnsannıñ aqılsızlığı ve ziyrekligi sport ile oğraşanına bağlı degil. Sport, küreşniñ farqlı çeşitlerinen oğraşqan insalar aqıllı olğanlarınıñ çoqtan-çoq misallerini köremiz. Uzaqqa barmayıq: Kliçko ağa-qardaş. Mutehassıs ayatını devam etmek maqsadını qoymayım. Sport ustası unvanını qazanmaq isteyim. 2009 senesinden kikboksingniñ Mix Fight yañı çeşitinde çalışmağa başladım. Bu yerde çoq lâyıq raqipler bar, onıñ içün er vaqıt çalışmaq kerek. Sportçı-aveskârnıñ yaşı 25 yaşqa qadar süre, ondan soñ sportqa vaqıt yetişmey. Doğrusını aytsam, çoq yazıq, çünki zallarda ne qadar vaqıt keçirildi.

Ayat maqsadlarım… Er keste olğanı kibi, işke kirmek, evlenmek ve yahşı yaşamaq. Qırımtatarnıñ daa nasıl maqsadı ola bile.

Öyle tendentsiyanı körem: evelde ayırılmaq içün, bir de bir cemiyetke ait olmaq, bir kimsege oşamamaq kerek edi, şimdi ise – zararlı alışqanlıqları olmağan, sportnen oğraşqan, ayatını boşun asarf etmegen insan olmaq kerek.

Sportnıñ esas musbet tarafı – beden inkişafından ğayrı, insannıñ tabiatı, ruhı inkişaf ete. Bu er daim zarur olğan hususiyetler.

Er bir müsülmannıñ kibi, kumirim – Muhammed peyğamber s.a.s. Oña oşamaq kerek, insanlardan eñ yahşısıdır, ve sunna boyunca yaşamaq kerek.

Dünya seviyesi küreşçilerden ise Mayk Zambidisni begenem, 16 yaşında 60 uruştan 48’ni nokaut ile bitirip, Ginnes rekordlar kitabına kire.

Er şeyden çoq yaqınlarımı ğayıp etmege qorqam. Sportçı olaraq, masqaralıqtan qorqam, uruş vaqtındaki masqaralıqtan. Yaralar yahşı olalar, masqaralıq ise bütün ömürge qala.

___________________________________________________________________________________

 

Mutehassıs tevsiyeleri: Tendürist olmaqnıñ sırları.

Esas beden meşğuliyetleri.

Dilâver MAMBETOV,

şut-fayting boyunca dünya çempionı

Ukrainanıñ uşu-sanda boyunca vitse-çempionı, M1 mutehassıs uruşlarınıñ ğalibi.

Tendürist olmaq içün, meşğuliyetler ritmni işletmek kerek. Adet üzre, yazda iç birisi meşğuliyetlerge qatnamay, sentâbrde başlaylar, qışqa yaqın ritmni işletemiz (beden ağırlıqlarğa alışa: doğru nefes aluv, dayanıqlıq pekitile). Esası, talapkârlıq ve ruhtan tüşmemek, bu yerde trenerler yardım eteler.

Yorulıp, ayaqta turmağa alıñız olmağanda, turmağa yardım etken trener kerek. Öz işini bilgen insannıñ yardımı kerek. Trenersiz olğan seviyede qalırsıñ.

İslâm MUSTAFAYEV,

serbest küreş boyunca Qırım toplu taqımınıñ azası.

Esas tevsiye – saba meşğuliyetleri, olar bütün künge küç bereler. Evelde buña qulaq asmay edim. Amma yapqan soñ, neticesini kördim. Em de saba meşğuliyetleri insan bedenindeki episi esnaslarnı tezleştire, bedenni qaviyleştire, hastalansañız bile, hastalıq tez keçe. Er daim tendürist olmaq içün, er kün çapmaq kerek: çapuv episi adalelerge yardım ete.

Birinciden umumiy beden azırlığına diqqat ayırır edim, çünki başlanğıç seviyede mahsus meşğuliyetlerden fayda körmek içün, kerekler. Başlanğıç seviyede, beden meşğuliyetlerge alışqance, ağır çekilerden qaçınmaq kerek. Meşğuliyetlerge başlamazdan evel, ekimge barsañız, yahşı olur, mümkün olğanını bilmek kerek. Kardiogrammanı yapmaq, umumiy analizlerni bermek kerek.

Er sport çeşitinde esas meşğuliyetler bar. Birinciden bu meşğuliyetlerge diqqat ayırmaq kerek. Trenerniñ aytqanını diñlemek kerek. Aşqa da diqqatlı olmaq kerek, yahşı yuqlamaq. Meşğuliyetler belli bir tertipte olmalı. O vaqıt neticeler de olur.

Men oğraşqan serbest küreşke kelgende ise, bu yerde men “demir” ile çalışam, çiftte iş. Esas maqsalardan biri – boyunnı qaviyleştirmek.

Azie Abla az