Kiyev memuriyet makemesinde makeme esnası kete, Bağçasarayda yaşağan 25 yaşındaki Susanna İsmailova İç işleri Nazirliginen pasportqa hicap – musulman qadınlarınıñ ananeviy yavlığı — ile foto yapmaq aqqı içün davalaşa. Öyle aqqını oña yaşağan yerinde bermediler – 25 yaşına kelip, ekinci foto pasportqa kerek olğanda, Bağçasaray şeeriniñ pasport işleri memuriyetinde. Qayd etmek kerek ki, evelki yaşağan yerde – Canköy rayonında, pasport alğanda, Susannağa hicap ile foto yapmağa izin berdiler.
“Hicap ile men endi on yıldan berli yürem, Quranğa köre, — dey Susanna. – Biz, qırımızıdan ğayrı, er bir tüsteki yavlıqnı kiye bilemiz. Hicapsız özümni tışarıda qolaysız duyar edim. Meni, belki, tanımaz ediler. Bu, er vaqıt közlük ile yürgen adam bir kün közlüksiz çıqqan kibi. Amma böyle adam pasportqa foto yapqanda, közlükni çıqarmay, aqqı bar. Musulman qadını urba ile qapalı olmaq kerek. Açıq tek eli ve yüzü ola bile. Bu bizim yaşam tarzımız, ve demokratik ülkede buna aqqımız olmaq kerek”.
Yaqında Susannanıñ üçünci oğlu doğdı, ve o, şimdi makeme oturışlarına barıp olamay, onıñ menfaatlarını makemede advokat Enver Ümerov qorçalay.
“Bu vaziyette memuriyetçi talimatı (Ukraina İİN’niñ №600 emrine köre pasporttaki fotoda insan baş kiyimsiz olmaq kerek) “Vicdan serbestligi aqqında” qanunğa ve Konstitutsiyağa uyğun kelmey, — dep añlattı Ümerov. – Onıñ içün cevapkâr olaraq Bağçasaray rayonınıñ İç işleri rayon bölügi degil de, İç işleri Nazirligi çıqa. Esnas tez keçmez, çünki bu meseleniñ çezilmesi içün Konstitutsiya ve Yuqarı makemelerniñ qararları kerek olacaq”. Enver Ümerovnıñ sözlerine köre, makemede o, hicap baş kiyimi degil, dindar musulman qadınınıñ urbasınıñ qısmı olğanını isbatlamaq tırışa. İleride daa makemecilerni hicap şahsiyetiniñ belgilemesinde mania olmağanında qandırmalı – çoqusı qızlarnıñ fotolarda uzun saçlar artında qulaqları körünmey, olarnı saç aldırmağa iç birisi mecbur etmey.
İsmailovanıñ advokatı Qırım, Donetsk, Zaporijjâ, Kıyiv, Harkiv, Lugansktan musulman qadınlarından endi 900-ğa yaqın ariza aldı, olar bu makeme işine qoşulmaq isteyler. Böyle kibi makeme işlerniñ Rusiyede ve Avropa ülkelerniñ çoqusında müsbet çezilüvi Ukrainada pretsedent olacağına inandıra.
QHA
Pasportqa hicap ile fotolar qoyula bilirmi degen fikirge nazir böyle ayttı: “Biz vatandaşlarnıñ konstiutsion aqları icra akmiyet organları nasıl areket etmek kerekligini, hususan böyle konkret vaziyetlerde, añlaşılması içün belgileyici olğanından areket etemiz. Adliye Nazirligi tüşüne ki, İş işleri Nazirliginiñ memüriyet vesiqalarında bu meselelerde sıñırlamalar olsa, bu sıñırlamalarnı baqıp çıqmaq ve lâğu etmek”.
“Biz çoq milletli, çoq konfessiyalı ülkemiz, ve dindar insanlarnıñ duyğularını ürmet etmek kerekmiz – bu, Konstitutsiyada da belgilengen”, — “Uryadovıy kuryer”de Nikolay Onişçuknıñ sözleri berile.