Mustafa Cemilev Ukraianada AQŞ-nıñ sabıq elçisi Vilyam Grin Millernen körüşti

11.05.20160:19

Mustafa Cemilev Ukraianada AQŞ-nıñ sabıq elçisi Vilyam Grin Millernen körüşti

2010 senesi 15 dekabr künü AQŞ-na ziyareti vaqtında Qırımtatar Meclis reisi Mustafa Cemilev Vaşıngtonda Ukrainada AQŞ-nıñ sabıq elçisi, al- azırda ise Vudro Vilson adına Halqara ilmiy merkeziniñ vekili Vilyam Grin Millernen körüşti.

Mustafa Cemilevni endi çoqtan tanığan Vilyam Miller onı ve Bütündünya qırımtatar kongressiniñ Koordinatsıon Keñeşiniñ azası, AQŞda qırımtatar diasporasınıñ temsili Aylı Bakkalını sıcaq qarşıladı.

Mustafa Cemilev Vilyam Millerge Qırımdaki vaziyetini, Ukraina Prezidenti saylavlarından soñ yüz bergen siyasiy deñişmeler aqqında tafsilãtlı ikãye etti.

 

Meclis reisi qırımtatar halqınıñ öz Vatanlarında haqlarını tiklenüvi ve Ukrainada onıñ havfsızlığı ve inkişafını temin etilmesi boyunca Halqara Forumnı keçirmek ğayesinde ayrıca toqtaldı.

Öz tarafından Vilyam Miller Halqara Forumnı keçirmek ğayesine yüksek qıymet kesti. ‘Vaşingtonda bulunır ekenim, şübesiz ayta bilem ki, qırımtatar halqına onıñ insan haqları oğrunda demokratik küreşine çoq adam qoltutar’-dep qayd etti Vilyam Miller. Aynı zamanda da amerika diplomatı şahsen özü de Halqara forumnıñ azırlanmasında iştirak etmege azır olğanını bildirdi.

Körüşüvniñ soñunda Mustafa Cemilev Vilyam Millerge Han-Saray resimini ve general Petro Grigorenko doğğanına 100 yıl tolması munasebeti ile Ukraina Milliy bankı tarafından çıqarılğan yübiley kapikni bağışladı.

Qırımtatar Meclisiniñ matbut hızmeti