“TCS-2011” Komissiyasınıñ temsilcileri

11.05.20160:19

Qırımtatar Milliy Meclisniñ

Ofisini ziyaret ettiler

2011 senesi 21 aprel künü Qırımtatar Milliy Meclis ofisinde Qırımtatar Milliy Meclis Reisiniñ birinci muavini ve Meclisniñ tış munasebetler bölüginiñ yolbaşçısı Ali Hamzinniñ Türkiyede oqumaq içün talebeler seçüvi boyunca “TCS-2011” programmasınıñ komissiya azalarınen körüşüvi olıp keçti.

Delegatsiya terkibine Türkiye Halq tasili nazirliginiñ aliy tasil idaresiniñ temsicisi Fürüzan Özçelik, Türkiye Halq tasili nazirliginiñ temsilcisi Rüştü Gedik, testler ve Türkiye oquv müessiselerge üleştirüv merkeziniñ temsilcisi Turay Karadede, Türkiye Nazirler şurasınıñ yanında türk halqları ile munasebetler boyunca nazirlikniñ hadimleri Yelir Öz ve Zahide Erbilli, Türkiye tış işler nazirliginiñ Reyhan Qalqay ve Türkiye İç işler nazirliginiñ temsilcisi Fatih Balci kirdiler. Komissiya terkibinde soñkilerniñ bulunması studentler deñişüvi ve öz territoriyalarında yabancı studentlerniñ bulunması suallerini çezgen Ukraina ve Türkiye qanuncılıqlarınıñ talaplarını yerine ketirmesini nezaret etmek kerekliginden kelip çıqa.

Türk musafirleri haber etkenleri kibi, 2011 senesi Türkiye büdjetinden para ile teminlengen büyük student leyhanıñ çerçivesinde “TCS-2011” programması 12 ülkede işletildi. Er bir ülkede Programmanıñ temsilcileri bar, olarnen beraber leyha ömürge keçirile. “Qırımda “TCS-2011” programması “Maarifçi” birligi ve Qırımtatar Milliy Meclisniñ qol tutuvı ile keçirile”, — qayd ettiler komissiya azaları.

 

Öz nevbetinde, Safure Kacametova haber etti ki, “TCS-2011” testlerinde iştirak etmek içün arizalar 8 aprelge qadar qabul etile ediler, bazılarğa qısqa müddet sebebinden ağır oldı. Buña baqmadan, 15 zenaat boyunca Türkiyeniñ 8 universitetiniñ 30 yerine oqumağa kirmek içün 53 ariza keldi.

24 aprel künü saat 9.00’da 12 ülkede bir standart boyunca “TCS-2011” programması ömürge keçirilecek.

Refat Çubarov, Mecliste komissiya azalarnı selâmlaraq, qayd etti ki, “TCS-2011” programması qırımtatarlar yaşları sırasından yüksek seviyeli mutehassıslar azırlanmasına yardım ete.

“Ebet, qırımtatar yaşlarınıñ çoqusı aliy tasilini Ukrainada ala. Aynı vaqıtta istidatlı yaşlarmıznıñ Poloniya, Rusiye, İngiltere, Türkiye universitetlerinde oquğanlarını isteyik, çünki Ukraina ve başqa ülkeler arasında integratsiya esnasları universal bilgiler saipleir olğan ve çoq til bilgen mutehassıslarnı talap ete. Bu munasebet ile Qırımda 1992 sensinden berli çalışqan “TCS-2011” programmasına tşekkür bildiremiz, onıñ yardımı ile yüzlernen yaşalr öz arzularına irişe bildiler, şimdi ise öz bilgilerini cemiyet faydasına işlete bileler”, — dedi Refat Çubarov.

Meclisniñ matbuat hızmeti