Qırımtatar halqınıñ aqlarını ğayrıdan tiklev aqqında
2009 senesi, oktâbr 10, Aqmescit
Oktâbrniñ 8-9 künleri Qırımda olıp keçken ‘Qırımtatar halqınıñ aqlarını ğayrıdan tiklev’ mevzusında Tögerek masanıñ işi çerçivesinde yer alğan qırımtatarlarnıñ Ukrainada şimdiki vaziyeti aqqında tafsilâtlı muzakereler neticesinde THMT Prezidium azaları ve Milliy Meclis idaresiniñ azaları THMT ve Milliy Meclisniñ qırımtatar aqlarınıñ tam ğayrıdan tiklenüvi ve Ukraina terkibinde Qırımnıñ milliy-territorial Muhtariyetini tiklemek içün öz haqlarını amelge keçirüvine doğrulğan işinde beraberlikte yapılacaq areketlerini tayin ettiler.
THMT ve qırımtatar halqınıñ Milliy Meclisi:
— Birleşken Milletler Teşkilâtınıñ insan aqları boyunca Şurasınıñ kütleviy köçürüvlerni insaniyetlikke qarşı cinayet olaraq qabul etmek oğrunda ğayretlerine qol tuta ve halqara cemaatçılıqnı 1944 senesi SSCB (SSSR) tarafından amelge keçirilgen sürgünlikni ve qırımtatarlarnıñ 46,2 faiziniñ yoq oluvına ketirgen yıllarnen ğurbetlikte mecburen tutqanlarını insaniyetke ve şahsen qırımtatarlarğa qarşı doğrulğan cinayet olaraq qabul etilmesine çağıra.
— Qırımnıñ tamır halqı olaraq, qırımtatar halqınıñ aqlarını, şu cümleden Ukraina terkibinde Qırım Milliy- territorial muhtariyetiniñ tiklenilmesine aqnı da, tam şekilde tiklenüvi içün barışıqlı ve zorbalıqsız küreşine destek köstere
— THMT ve Qırımtatar Milliy Meclisi halqara cemaatçılıqnı, şu cümleden Avropa Birliginiñ azaları olğan devletlerni qırımtatar halqınıñ uquqlarını tiklev esnasına qoltutmalarına celp etilmesi boyunca beraberlikte yapılacaq iş ve areketleriniñ işlenüvi ve amelge keçirüvini başlay.
— Ukraina devletini qırımtatar halqınıñ aqlarını halqara uquq printsiplerine binaen ve Qırımtatar Milliy Meclisi ile beraberlikte tam şekilde tiklenüvini devam etmege çağıra.
Ledum Miti, THMT prezidenti
Refat Çubarov, Qırımtatar Milliy Meclisi reisiniñ birinci muavini