Milliy Meclis Prezidiumnıñ Arizası Qırğızıstan Cumhuriyetiniñ cenüp vilâyetlerinde facialı vaqialar aqqında

11.05.20160:19

Qırğızıstan Cumhuriyetiniñ cenüp vilâyetlerindeki soñki künleriniñ facialı vaqiaları çarpışmalar, ğaddarlaşuv, qatliam ve insanlar öldürüvine çevirildiler.

Qırğızstan Cumhuriyetinde peyda olğan gumanitar qaza halqara cemaatçılığını ve yaşağan yerine baqmadan episi insanlarnı pervasız qaldırıp olamay.

Facia toqtatılması boyunca qarar çıqarılmaması yañı ölümlerni ketire. Er saat degerli olğan vaziyette halqara cemaatçılıq, ilk evelâ BMT Havfsızlıq Şurası, Qırğızıstan Cumhuriyetinde qan tökülmesiniñ toqtatılmasına yonelgen tedbirelr keçirmek kerek.

Bu künleri Qırımtatar Milliy Meclisi konflikt merkezinde olması mümkün olğan qırımtatarlarnıñ taqdirini bilmek maqsadınen Qırğızıstan Cumhuriyetiniñ qırımtatar diasporası vekillerinen daimiy bağ tutmaqta. Lâkin olğan malümat tolu degil ve Qırğızıstan Cumhuriyetiniñ cenüp vilâyetlerinde yaşağan qırımtatarlarğa yardım kerek olğan vaziyetni bilmege imkân bermey. Bu munasebet ile biz aqrabaları Qırğızıstan Cumhuriyetinde yaşağan vatandaşlarımızğa kerek olğanda Qırımtatar Milliy Mecliske muracaat etmek ricasınen bulunamız.

 

Qırımtatar Milliy Meclisi Qırğızıstan Cumuhriyetiniñ cenüp vilâyetlerindeki facialı vaqialarda elâk olğanlarnıñ soy-aqrabalarına teren taziye bildire ve zıddiyette olğan tarfalarnı silâ qullanmadan konfliktni çezmege çağıra.

Qırımtatar Milliy Meclisi Prezidiumnıñ

oturışında qabul olundı,

2010 senesi iyun 15 künü,

Aqmescit