Bu gazeta bizge kerekmi?

11.05.20160:19

Soñki vaqıtları, qırımtatarlarnıñ kompaktlıq yerleşme qasabalarında Hizbut-Tahrir fırqasınıñ temsilcileri faal tarzda kendi basma organını – ‘Vozrojdeniye’ gazetasını darqatıp başladılar. Olar israrlıqnen qapı qaqalar, çañ çalalar, ya da ‘Ev saibi!’ dep bağıralar, soñra tebessümle ve vaiz körünişi ile doğru ellerimizge kendi qıymetli neşirlerini tuttıralar. Esleñiz ki, olar gazetanı poçta qutusına bıraqmaylar, olar içün şahsiy munasebet emiyetlidir.
Bu ‘Davat’qa – davetke, dinge çağırılmağa beñzey. Bu vazifeni sekta azaları etraftakilerni usandırıp, kendi fikirlerini masallat etip, islâmda cebr olmağanını unutıp, pek ğayretli becereler. Yani olar dinni kütlelerge alıp keteler, islâmnı cayratıcı, daa doğrusı missioner faaliyeti ile oğraşalar. Olarnıñ teren inamlarına köre, Müftilik dinge çağırmay, vatandaşlarına islâmnı iza etmey, meselâ, raqı içip, domuz etini aşamaq haram olğanı aqqında tarif etmey eken, olar ise, ‘aqiqiy müsülmanlar’, bunı Müftilik yerine yapa ekenler.
Tabiy ki, Qırım müsülmanlarınıñ Ruhiy idaresiniñ kündelik, edinip yapılğan işleri: Müftiniñ ve Müftilik azalarınıñ kütleviy haberler vastalarında muntazam çıqışları, müsülman bayramlarını, urf-adetlerini, tedbirlerini keçirilmesi, umummilliy toplaşuvlarında, hayırperverlik proektlerinde iştirak etmeleri, Qırım camilerinde namaz vaqıtlarında hutblarnıñ keçirilmesi, umumen QMRİ-ne tabi olğan imamlarnıñ faaliyeti ve daa çoq başqaları emiyetli degil.
Şunıñ içün hizbler dinni alıp ketmek, gazetanı alıp ketmek mecburlar.
‘Vozrojdeniye’ gazetasını oqurken, qırımtatarı nasıl bilgiler ala bile? İslâm aqqında ayrı bilgiler, tek rus tilinde fikir ve laf etken, endi müsülman olğannı meraqlandırğan er şey, muqaddes Qur’andan ayetler ve süreler, internetten bir sıra malümat, palestina müsülmanlarınıñ problemleri, ve eñ meraqlısı – Müftilikni teñqit etme, daa doğrusı – sögüş. Bundan da ğayrı, ‘Hizbut-Tahrir’ fırqasının nefesi ve simvolikası.
Aziz vatandaşlar!
Sektantlar ellerinden bu gazetanı alıp oqumaq kerekmi? Çünki onıñ saifelerinde muqaddes dinimiz islâm aqqında doğru sözler altında ‘Hizbut-Tahrir’ siyasiy fırqa-sektasınıñ, müsülmanlarğa yat olğan, maqsat ve vazifeleri saqlanmaqta. Keliñiz, islâmnı Müftilik tarafından ruhset berilgen, edebiyat ve milliy pressasını oqup menimseyik.

 

Ayedin Hatip.