Teşekkür aytamız

11.05.20160:19

Taşkentte yerleşken “Avdet” milly medeniy qırımtatar merkeziniñ reisi Cemilev Nusretniñ adından bizim şeerimizde yaşağan bir qaç yaşlarğa özümizniñ teşekkürlerimzini bilidrmek iseymiz.

Halq medeniyeti, ruhu neden bay ola? Yaşlarnıñ eyi işlerindendir. Halqımıznıñ çoqusı Qırımğa köçip ketken soñ, mezarlıqlarımıznıñ alı pek müşkül oldı. Olarnı baqmağa adam qalmağan soñ, bu büyük işni öz ellerine alğan 85 yaşındaki Abdulâlimov Abdureim qartbabamız keçekn afta merkezimizge keliip, yardım soradı. “Menim küçüm endi yetmey, amma yardım etmege kimseni tapalmayım”, dedi o.

 

Abdureim qartbabamıznıñ adı büyük ariflernen yazılmaq kerek, çünki o, halqımız içün pek çoq eyi işler yapa. O, oña oşağan qart ve alicenap adamlarımzıdan biri olıp, Çilanzarda yaşay, andaki halqımıznıñ episini tanıy, olarnıñ allarını bile, töşekte yatqan hastalarğa barıp, olarnı yoqlay, olarğa elinden kelgeni qadar yardım ete. Amma bu insannıñ yaşı da bayağı. Oña baqmadan ep tırışa, öz yüregin, canını bere. Er yıl mayıs ayında adamlar mezarlıqta toplanğanda, anda dua keçire, mezarlıqnı tertipke ketire.

Bu sefer de sıcaqqa baqmadan, merkezimizge kelip, Dombrabatta yerleşken mezarlığımıznıñ müşkül alda qalğanını ayttı. O “aqça bar, amma çalışmağa adam tapalmayım, para berip mezarlığımıznı temizletecem, amma kimse bu işke belni bağlamağa istemey, özüm küçüm yetmey”, dedi o. Bunı eşitken merkezimizniñ faal azalarımız olğan yaşlarımızdan biri, Serliyev Eskender “Men İnternetke yazayım ve adamlarnı toplayım”, dep rica etti. Bu İnternet malümatnen tanışqan, çoqusı oña işni böyle yapmaq, öyle yapmaq kerek dep, aqıl ögrettiler, amma kelgenlerden tek beş yigit oldı. Olarnıñ sırasında: Serliyev Eskender, Suleymanov Abdulla, Abdurahmanov Alim, Ablâkimov Rustem, Ablâlimov Nariman bazar künü öz işlerini taşlap, mezarlıqqa keldiler ve Abdureim qartbabamıznen beraber mezarlıqnı temizlediler, pek ösken tereklerniş kestiler, otlarnı ciyip köterip attılar ve ondan soñ ellerini köterip dualar oqudılar. Allah etken işlerini eyilikte qaytarsın, canlarını, bedenleri sağ-selâmet olıp, Allah evlerinde, işleirnde qolay ketirsin, çoq daa sevap işlerimizde yardım etmesine nail etsin. Ana-balaları böyle balalarnı terbiye etken ve östirgenine çoq teşekkür bildiremiz ve olarğa da sağ-selâmetlik, işleri oñdan kelsin dep, dualar oquymız. Ölgenleriniñ canları cennette olsun, yatqan yerleri Quran yarığınen yarıqlansın ve bizim mezarlıqlarımız temizlik ve kerek tertibinde olsun. Bu kerekli işlerge qollarından kelgence yardım etkenlerge Allah sevaplar yazsın ve eyiliklerinde qaytarsın. Çoq sağ olsun! Böyle yaş yigitlerimiz olğanını bilip, biz qarurlanamız ve olardan örnek almağa er keske nasip olsun, dep Allahqa işanamız. Böyle adamlar camaatımızda bar eken – halqımıznıñ bahtı iç bir vaqıt sözmez ve çoq eyi işlerge irişirmiz. İnşallah.

“Avdet” merkeziniñ idare azalar adından Dilâra Kadırova