Yaltada Mustafa Cemilevniñ Gagauziya Prezidenti Mihail Farmuzal ile körüşüvi olıp keçti
2010 senesi 22 avgust künü Qırımtatar Milliy Meclisniñ Reisi Mustafa Cemilev Gagauziya Prezidenti Mihail Farmuzalnı Yalta şeerine iftarğa davet etti. Gagauziyanıñ yolbaşçısı ailesi ile Qırımda raatlana. İftarda Bütündünya qırımtatar kongressiniñ Prezidenti Refat Çubarov, Meclis azaları Ali Hamzin, Zaur Smirnov ve Yalta regional meclis reisiniñ vazifesini becergen Usein Çapuh de bulundılar. Körüşüv devamındaki olğan sübette Meclis Reisi ve Gagauziya Prezidenti bir birine qırımtatar ve gagauz halqlarınıñ zemaneviy vaziyetleri aqqında, Ukraina ve Moldovada üküm sürgen esnanlar ketişatında halqlarnıñ inkişafları perspektivası aqqında haber ettiler. Refat Çubarov Bütündünya qırımtatar kongressi ve Bütündünya gagauzlar konressi arasında “eki türkiy halqlar arasındaki dostluqnı pekitmek maqsadı ile” medeniy işbirlik programmasınıñ inkişafı aqqında teklifnen çıqışta bulundı. Gagauziya Prezidenti Mihail Formuzal bunınen razı olıp, yardım etmek azırlığını bildirdi.
Sübetniñ soñunda Gagauziya Prezidenti qabul etüv içün minnetdarlıq bildirip, Qırımtatar Milliy Meclisniñ Reisi M.Cemilevni Gagauziyanıñ paytahtını ve Komrat şeerini uyğun olğan vaqıtta ziyaret etmege davet etti.
Meclisniñ Matbuat hızmeti