‘Yaşlar şurası’nıñ ilk toplaşuvı

11.05.20160:19

Yanvarnıñ 15-de QMPÜ-niñ binasında ‘Mecal’ ve ‘Qırım vatanperver gruppası’nıñ teşebbüsi ile , yaşlar teşkilãtları birleşip, yañı, resmiy yaşlar teşkilãtınıñ meydanğa ketirmek niyetinen umumiy toplaşuvnı keçirdiler.

Toplaşuvğa çeşit zenaatlarğa ait yigit ve qızlarımız keldiler. Olarnıñ aman-aman episi mezkür eki teşebbüs teşkilãtınıñ azaları olıp, öz faalligini çeşit tedbirlerde numayış etmekteler ve milletine lãqayt qalmağanlarını közetmek mümkündir. Şimdi ise olar resmiy bir teşkilãtnı meydanğa ketirmek niyetindeler ve toplaşuvda, ilk evelã, ‘böyle yañı teşkilãtınıñ kerekligi barmı?’ degen sual turmaqta edi. Kelgenlerden er birisi bu aqta öz fikir-tüşüncesini bilidirdi. Qayd etmek kerek ki, iç birisi qarşı çıqmayıp, teşkilãtnıñ meydanğa kelmesine qol tuttılar. Toplaşuvnıñ reisi Dilãver Akiyev Qırımda faaliyet köstergen diger teşkilãtlarından ayırğan, yañı teşkilãtınıñ hususiyetine ayrı diqqatnı celp etti. Mesele şunda ki, bu meydanğa ketirilgen teşkilãtnıñ reisi olmaycaq, bütün meseleler ve sualler üzerinde qararnı umumiy toplaşuv ve ‘Buyük divan’ rey berüv esasında çıqaracaqlar. ‘Büyük divan’- bu yaşlar teşkilãtınıñ eñ faal 21 azalardan teşkil olunğan, eda etici bölüktir. Bu bölük içersinde: diniy, medeniy, til ve maarif, adliye, maliye idaresi, hayriye, cemaatnen alãqalar ve PR usulları, içki maarif inkişafı, sport ve beden terbiyesi kibi bölüklek faaliyet kösterecekler.

 

Eñ çoq muzakereler teşkilãtnıñ adınen bağlı edi. Qayd etmek kerek ki, ‘Yaşlar şurası’ adınen bazıları razılıqsıznı numayış etkenler, lãkin teklif olunğan bir qaç variantlar arasında mezkür ad qabul olundı. Bu munaqaşalı aldan ğayrı, toplaşuv devamında itirazlı, davalı meseleler peyda olmadı, çünki bu yaşlarnı bir ğaye, bir dünyabaqışı topladı. Tezden endi resmiy olaraq taqdim olunğan teşkilãttan, tezden yañı leyhalarnı köre bilirmiz, degen ümüttemiz.

Aliye Seferşa.