Zemaneviy ukrain aqiqatnıñ ögrenilmesi qırımtatarlar vaziyetiniñ tafsilâtlı baqılmasını talap ete
2010 senesi 22-25 sentâbr künleri İsveçre “Sodertorns” araştırma universitetiniñ professorları ve aspirantları gruppasınıñ ziyareti çerçivesinde, 2010 senesi 24 sentâbr künü Bahçisarayda Qırımtatar Milliy Meclisniñ Reisi, Ukraina halq deputatı Mustafa Cemilev “Sodertorns” universiteitniñ vekilleri ile körüşti. Olar Ukrainağa zemaneviy ukrain aqiqatnı ögrenmek içün ve ileride ukrain zenaatdaşlarınen işbirlik tutmasınıñ imkânlarına qıymet kesmek içün keldiler.
Bahçisaray qoruqnıñ hadimleri muafirler içün meraqlı ekskursiya keçirdiler, qırımtatar halqınıñ tarih ve medeniyet abideleri aqqında tafsilâtlı tarif ettiler.
“Sodertorn” universiteti vekilleriniñ Meclis yolbaşçılığınen qonuşması Zıncırlı medrese kompleksinde devam etti. Körüşüvde iştirak etken Meclis Reisiniñ birinci muavini Refat Çubarov öz çıqış sözünde qırımtatar halqınıñ tarihına qısqa ekskurs teklif etti. O, Qırım hanlığınıñ siyasiy ayatı deviri aqqında, 1944 senesi sürgünliginiñ deşetli aqibetleri aqqında, Qırımtatar milliy areketniñ faaliyeti aqqında, qırımtatarlarnıñ öz tarihiy vatanına qaytmaq içün yapqan birinci ıntıluvları aqqında tarif etti. Zemaneviy devirni de Refat Çubarov tafsilâtlı seslendirdi, Qırımtatar halqınıñ Qurultayı ve Meclisniñ faaliyetini, qırımtatar halqınıñ öz-özüni idare etüv qurumlarını, qırımtatarlarnıñ temsil qurumları saylanıluvı sistemasınıñ hususiyetlerini aks etti.
Körüşüv devamında Meclis Reisi Mustafa Cemilev Sodertorns universitetiniñ araştırmacılarına Qırımdaki zemaneviy vaziyetni özü nasıl körgenini, qırımtatarlarnıñ repatriatsiya esnasında peyda olğan meseleler aqqında tarif etti ve milliy mektepler etrafındaki vaziyetine, balalarnıñ ana tilini ögrenmek imkânlarına, yaqında keçken Bütündünya qırımtatar kongressiniñ faaliyeti perspektivalarına, akimiyet organlarında qırımtatarlarnıñ temsilciligine, olacaq saylavlarda iştiraklarına dair çoq suallerge cevap berdi.
İsveçre tarafınıñ vekilleri körüşmek imkânı ve sıcaq qabul etilgenleri içün teşekkür bildirdiler. Hususan, Sodertorns universitetiniñ Baltiya ve Şarqavropa araştırmaları merkeziniñ müdiri professor Anu Mai Koll böyle kibi körüşüvlerniñ sabıq sovet territoriyasındaki vaziyetni añlamaq içün ne qadar müim olğanlarını qayd etti. Öz nevbetinde, Sodertorn universitetiniñ Baltiya ve Şarqavropa aliy mektepniñ tasil sualleri boyunca müdiri doktor Ann-Katrin Hungar qayd etti ki, İsveçrede Mustafa Cemilevniñ sovet devirindeki uquqqoruyıcı faaliyetini hatırlaylar, professor Mark Bassin ise zemaneviy dünyada etnikara munasebetlerniñ uyğulanması geosiyasiy stabillikni pekitmek içün müim faktor olğanına diqqatnı celp etti.
Ukrain tarafından ziyaretniñ koordinatsiyasını Kiyev-Mogilân akademiyası Milliy universitetniñ siyasetşınaslıq boyunca magister programmasınıñ ocası, felsefe ilimleri namzeti Sergey kurbatov becerdi.
Qırımtatar Milliy Meclisniñ Matbuat hızmeti