Nuri ve Ebzade Halilovlar

11.05.20160:19

Ğalebe bayramınıñ arfesinde oquyıcılarımızğa cenkniñ birinci kününden soñkisine qadar Vatannı qorçalağan eki acayıp insan, Ulu Vatandaş cenkiniñ qaramanları Halilovlar Nuri Saidoviç ve Ebzade Ganiyevna aqqında tarif etecekmiz.

 

Nuri ağa cenkni birinci daqiqasından Brest şeeri yanında qarşılap, toprağımızğa kirgen faşistler ile uruşqa qoşuldı. Uruşta arqadaşlarınıñ çoqusı elâk oldılar. O, sağ qalğan askerler ve komandirlernen 1941 senesiniñ soñuna qadar Belorusiya ormanlarında partizanlıq yaptılar. 1941 s. dekabr ayında Qırımğa keçmege istegende, politsiya onı tutıp, Nikolayev arbiy esirler lagerine bere. 1942 s. soñunda esirlikten qaçıp, 1943 s. yazda Şimal birleşmeniñ Qırım partizanlar brigadasına kete. Gruppa komandiri ve 21 otrâdnıñ razvedkacısı ola. Brigada ve otrâdlar keçirgen bütün arbiy operatsiyalarında iştirak ete edi. Qırımnı, Aqmescitni azat ete edi. Aq-Yarnıñ azat etilmesinde işitrak etken edi. Ormandan çıqqan soñ, Primorsk ordusınıñ yedek polkuna yollanıldı. 1944 s. iyünde demobilizatsiya etildi. Taşkentke kelip, qorantasını topaldı. 2 derece UVC ordeni ve 8 yubiley medaller, “Qırım partizanı” znaki ile mukâfatlandırıldı.

Almaniyad açalışmaq yerine Ebzade Ganiyevna partizan otrâdına ketmege qarar berdi. Böyle etip, 1943 s. noyabr ayında o, Zuya partizan otrâdına kire. Yañı ağır ve havflı ömür başlana. Suvuqta, bazıda aşsız, sıcaq urba ve ayaqqapsız, olar duşmannı rata qaldırmay ediler. Ebazade Halilova başqa partizanlarnen beraber uruş operatsiyalarında, orman ava limanlarınıñ qorumasında iştirak ete edi. 1944 s. tedaviylenmek içün uçaq ile Krasnodarğa yollanıldı: ayaqları buzlağan edi. Tedaviylengen soñ, arbiy gospitalge çamaşır yuvucısı olaraq alındı ve keriç platsdarmına keçirildi. Aq-Yar azat etilgen soñ, demolizatsiya etildi. Aqayı ile oğul, oğlan torun ve üç qız torunnı terbiyelediler.